Jodo Yatra: రాజస్థాన్‌ సంక్షోభ వేళ.. రాహుల్ బంతాట..!

పాలక్కాడ్: రాజస్థాన్‌లో ముఖ్యమంత్రి పీఠం కోసం రెండు వర్గాల మధ్య ఘర్షణ.. అక్కడ సంక్షోభానికి దారితీసింది. సీఎం కుర్చీని వదులుకోవడానికి ఇష్టపడని అశోక్‌ గహ్లోత్‌, దానిపై ఎలాగైనా కూర్చోవాలని ఎదురుచూసే సచిన్‌ పైలట్‌ వర్గాల మధ్య పోరు భగ్గుమంటోంది. ఈ అంతర్గత కుమ్ములాటను ఎలా పరిష్కరించాలో తెలియక అధిష్ఠానం తల పట్టుకుంది. ఈ సమయంలో హస్తం పార్టీ అగ్రనేత రాహుల్ గాంధీకి సంబంధించిన వీడియో ఒకటి నెట్టింట్లో వైరల్‌గా మారింది. 

కాంగ్రెస్  భారత్‌ జోడో యాత్రలో భాగంగా రాహుల్ కేరళలో పర్యటిస్తున్నారు. ప్రజలను పలకరిస్తూ.. పాదయాత్రను సాగిస్తున్నారు. ఈ క్రమంలో  మార్గం మధ్యలో పిల్లలతో కలిసి బంతాట ఆడారు. ఉదా రంగు దుస్తులు ధరించి కొందరు బాలురు రాహుల్‌తో సాగుతూ.. ఫుట్‌బాల్‌ ఆడారు. ఆయనకూడా బంతి విసిరి వారిని ఉత్సాహపరిచారు. ఈ వీడియోను కాంగ్రెస్‌ ట్విటర్‌లో షేర్ చేస్తూ.. ‘ పిల్లల భవిష్యత్తును తీర్చిదిద్దాలి. అందుకోసం ప్రతి అడ్డంకిని ఎదుర్కోవాలి’ అని వ్యాఖ్యను జోడించింది. ప్రస్తుతం ఈ వీడియో సామాజిక మాధ్యమాల్లో చక్కర్లు కొడుతోంది. రాజస్థాన్‌ సంక్షోభ వేళ.. వెలుగులోకి వచ్చిన ఈ దృశ్యాలపై నెటిజన్లు విమర్శనాత్మకంగా స్పందిస్తున్నారు. 

జోడో యాత్ర 150 రోజుల పాటు 3 వేలకు పైగా కిలోమీటర్ల మేర సాగనుంది. సెప్టెంబర్ ఏడున ఇది తమిళనాడులో కన్యాకుమారి నుంచి ప్రారంభమైంది. జమ్మూకశ్మీర్‌తో ముగియనుంది. ప్రస్తుతం కేరళలో సాగుతోన్న ఈ యాత్ర.. అక్టోబర్‌ ఒకటికి కర్ణాటకకు చేరుకోనుంది.