Sonia Gandhi: సోనియా గాంధీ వ్యక్తిగత కార్యదర్శిపై అత్యాచారం కేసు!

దిల్లీ: కాంగ్రెస్‌ అధ్యక్షురాలు సోనియా గాంధీ వ్యక్తిగత సహాయకుడిపై అత్యాచార కేసు నమోదైంది. ఓ మహిళ ఫిర్యాదు మేరకు సోనియా వద్ద వ్యక్తిగత కార్యదర్శిగా పనిచేస్తున్న పీపీ మాధవన్‌పై దిల్లీ పోలీసులు రేప్‌ కేసు నమోదు చేశారు. అత్యాచారంతో పాటు మాధవన్‌పై బెదిరింపు అభియోగాలూ మోపారు. పెళ్లి పేరుతో మాధవన్‌ తనను మోసం చేశాడని, శారీరకంగా లొంగదీసుకున్నాడని ఆ మహిళ ఉత్తమ్‌నగర్‌ పోలీసు స్టేషన్‌లో ఫిర్యాదు చేసింది.

తన భర్త దిల్లీలోని కాంగ్రెస్‌ కార్యాలయంలో పనిచేసేవాడని, అతడు 2020లో మృతిచెందినట్లు సదరు మహిళ ఫిర్యాదులో పేర్కొంది. భర్త మృతి అనంతరం ఆ పని ఇప్పించాలని మాధవన్‌ని సంప్రదిస్తే.. పెళ్లి పేరుతో వేధించాడని పేర్కొంది. అనంతరం మరుమార్లు తనపై అత్యాచారానికి పాల్పడినట్లు ఫిర్యాదులో తెలిపింది. కాగా పోలీసులు 376, 506 సెక్షన్ల కింద కేసులు నమోదు చేసుకొని దర్యాప్తు చేస్తున్నట్లు తెలుస్తోంది.