టీకాల పురోగతి ఆశా కిరణంలా ఉంది: గుటెర్రస్‌

న్యూయార్క్‌: కరోనా వైరస్ నివారణ టీకాల అభివృద్ధికి సంబంధించి ఇటీవల సాధించిన పురోగతిని ఐరాస సెక్రటరీ జనరల్ ఆంటోనియో గుటెర్రస్ ‘ఆశాకిరణం’గా అభివర్ణించారు. ఈ టీకాలు ప్రతి ఒక్కరికి అందుబాటులోకి రావాలని, ఔషధాలు, చికిత్సల అభివృద్ధికి జీ-20 దేశాలు సహకరించాలని కోరారు. తమ టీకా 95 శాతం సమర్థత కలిగి ఉందని, వృద్ధుల్లో కూడా మంచి పనితీరు కనబరుస్తుందని ఔషధ సంస్థ పైజర్ ప్రకటించిన సంగతి తెలిసిందే. 

‘కరోనా టీకా అభివృద్ధిలో సాధించిన పురోగతి ఆశా కిరణంలా కనిపిస్తోంది. అయితే, ఆ కిరణాలు అందరికి చేరాల్సిన అవసరం ఉంది. టీకాలను ప్రపంచ వినిమయ వస్తువులుగా పరిగణిస్తున్నామని నిర్ధారించాల్సి ఉంది. అవి అందరికి, అన్నిచోట్లా అందుబాటులో ఉండాలి. మహమ్మారిని నిలువరించడానికి ఇదే ఏకైక మార్గం. టీకా తయారీ, పంపిణీకి నిధులు చాలా కీలకం. జీ-20 దేశాలకు వనరులున్నాయి. ఆ దేశాలు సహకరించాలని అభ్యర్థిస్తున్నాను’ అని ఓ మీడియా సమావేశంలో మాట్లాడారు. కాగా, ప్రపంచ వ్యాప్తంగా కరోనా వైరస్ విజృంభణ కొనసాగుతోంది. ఇప్పటివరకు 5.7 కోట్ల మందికిపైగా ఆ వైరస్ బారిన పడగా, 13,71,241 మరణాలు సంభవించాయి.