అజర్‌బైజాన్‌లో రాకెట్‌ దాడి

ఐదుగురు సజీవ దహనం.. 17 మందికి గాయాలు

బాకు: వివాదాస్పద నాగోర్నో-కరాబాఖ్‌ ప్రాంతంపై ఆధిపత్యం కోసం సాగిస్తున్న పోరులో అజర్‌బైజాన్‌పై ఆర్మేనియా రాకెట్‌ దాడికి పాల్పడింది. ఈ ఘటనలో ఐదుగురు పౌరులు సజీవదహనమయ్యారు. గంజా నగరంలోని ఓ ఇంటిపై రాకెట్‌ దాడి జరపడంతో మంటలు వ్యాపించి అందులో నివసించే ఐదుగురు పౌరులు దుర్మరణం పాలయ్యారు. పదుల సంఖ్యలో గాయపడ్డారు. ‘ఆదివారం గంజాలోని ఓ ఇంట్లోకి రాకెట్‌ దూసుకెళ్లింది. అనంతరం తీవ్ర మంటలు వ్యాపించి ఆ బిల్డింగ్ పూర్తిగా కాలిపోయింది. మంటల్లో చిక్కుకున్న ఐదుగురు అక్కడికక్కడే మృతిచెందారు’ అని స్థానిక ప్రభుత్వాధికారులు వెల్లడించారు. మరో 17 మంది గాయపడ్డట్లు తెలిపారు. ‘రాకెట్‌ దాడిలో మంటలు వ్యాపించి ఓ బిల్డింగ్‌ పూర్తిగా కాలిపోయింది. ఘటనలో ఐదుగురి మృతదేహాలను స్వాధీనం చేసుకున్నాం. 17 మంది గాయపడ్డారు. ప్రమాద స్థలంలో సహాయక చర్యలు కొనసాగుతున్నాయి’ అని ప్రభుత్వం ఓ ప్రకటనలో వెల్లడించింది.