Rohini Court: ‘ఆ న్యాయవాదిని చంపేందుకే టిఫిన్‌ బాక్స్‌ బాంబు పెట్టా’

రోహిణి కోర్టు పేలుడు కేసులో డీఆర్‌డీవో శాస్త్రవేత్త అరెస్ట్‌

దిల్లీ: దిల్లీలోని రోహిణి కోర్టులో ఇటీవల జరిగిన పేలుడు ఘటనకు సంబంధించి దిల్లీ స్పెషల్‌ పోలీస్‌ సెల్‌ తాజాగా ఓ డీఆర్‌డీవో శాస్త్రవేత్తను అరెస్టు చేసింది. న్యాయ వివాదాల నేపథ్యంలో ఓ లాయర్‌ను హతమార్చేందుకే ఈ పేలుడుకు పాల్పడినట్లు సమాచారం. సీసీ కెమెరా ఫుటేజీలు, ఘటన జరిగిన సమయంలో ఆ న్యాయవాది కోర్టులోనే ఉండటం, బ్యాగ్‌పై ఓ కంపెనీ లోగో తదితర ఆధారాలతో నిందితుడిని అరెస్టు చేసినట్లు అధికారులు వెల్లడించారు.

న్యాయ వివాదాలు తనను మానసికంగా కలవరపెట్టాయని, ఈ కారణంగానే లాయర్‌ను హత్య చేయాలనే ఉద్దేశంతో టిఫిన్‌ బాక్స్‌ బాంబు పేలుడుకు పథకం పన్నానని నిందితుడు అంగీకరించినట్లు సంబంధిత వర్గాలు తెలిపాయి. పేలుడు పదార్థాల తయారీ పరిజ్ఞానం కూడా ఉన్నట్లు అతను ఒప్పుకొన్నాడని చెప్పాయి. మరోవైపు ఆ న్యాయవాది.. నిందితుడిపై 10 కేసులు నమోదు చేసినట్లు ఓ అధికారి వెల్లడించారు. ఈ వ్యవహరంలో దర్యాప్తు ప్రక్రియ కొనసాగుతోందని తెలిపారు.

డిసెంబరు 9న కోర్టులోని రూం నంబర్‌ 102లో జరిగిన ఈ పేలుడులో ఓ వ్యక్తి తీవ్రంగా గాయపడిన విషయం తెలిసిందే. భారీ ఎత్తున శబ్దం రావడంతో అక్కడున్నవారు భయాందోళనలతో పరుగులు పెట్టారు. అంతకుముందు సెప్టెంబరులోనూ ఇదే కోర్టు ఆవరణలో ఓ గ్యాంగ్‌స్టర్‌పై ప్రత్యర్థి గ్యాంగ్‌ కాల్పులు జరిపి, హత్య చేసిన విషయం తెలిసిందే. అదే సమయంలో పోలీసులు జరిపిన ఎదురు కాల్పుల్లో ఇద్దరు దుండగులూ హతమయ్యారు. దీంతో ఈ కోర్టులో భద్రతా చర్యల నిర్లక్ష్యంపై పెద్దఎత్తున విమర్శలు వచ్చాయి.