Investments: జమ్మూకశ్మీర్‌కు పెట్టుబడుల వెల్లువ: కేంద్రం

దిల్లీ: జమ్మూకశ్మీర్‌లో అధికార యంత్రాంగం రూపొందించిన ప్రత్యేక పారిశ్రామిక విధానంతో భారీగా పెట్టుబడులు వచ్చిపడుతున్నాయి. పరిశ్రమల ఏర్పాటుకు ముందుకొచ్చే వారికి జోన్‌ల వారీగా ప్రోత్సాహకాలు ఇవ్వడంతో పలువురు పారిశ్రమికవేత్తలు పెట్టుబడుల పట్ల ఆసక్తి చూపుతున్నారు. గతంలో రూ.వెయ్యి కోట్లు కూడా మించని పెట్టుబడులు ఈ ఏడాది మాత్రం భారీ స్థాయిలో వచ్చిపడుతుండటం విశేషం. ఇప్పటివరకు జమ్మూకశ్మీర్‌కు రూ.64 వేల కోట్ల ప్రతిపాదనలు రాగా.. ఇప్పటికే రూ.2,500 కోట్లకు పైగా పెట్టుబడులు వచ్చాయని కేంద్ర ప్రభుత్వం తాజాగా ప్రకటించింది. ఈ మేరకు కేంద్ర హోంశాఖ సహాయమంత్రి నిత్యానంద్‌ రాయ్‌ లోక్‌సభకు ఇచ్చిన లిఖితపూర్వక సమాధానంలో ఈ వివరాలను వెల్లడించారు. జమ్మూకశ్మీర్‌లో 2017-18 ఆర్థిక సంవత్సరంలో రూ.840.55 కోట్ల పెట్టుబడులు రాగా.. 2018-19లో రూ.590.97 కోట్లు, 2019-20లో రూ.296.64కోట్లు; 2020-21లో రూ.412.74 కోట్లు; 2021-22లో రూ.376.21 కోట్లు వచ్చాయని సమాధానంలో వివరించారు.