Published : 02 Jul 2022 02:13 IST

Nupur Sharma: అధికార పార్టీ సిగ్గుతో తల దించుకోవాలి : కాంగ్రెస్‌

నుపుర్‌ శర్మపై సుప్రీంకోర్టు ఆగ్రహం వ్యక్తం చేసిన నేపథ్యంలో స్పందన

దిల్లీ: దేశవ్యాప్తంగా చోటుచేసుకుంటున్న దురదృష్టకర ఘటనలకు భాజపా మాజీ నేత నుపుర్‌ శర్మ (Nupur Sharma)నే పూర్తి బాధ్యురాలంటూ భారత అత్యున్నత న్యాయస్థానం చేసిన వ్యాఖ్యలతో అధికార పార్టీ తలదించుకోవాలని కాంగ్రెస్‌ (Congress) పార్టీ పేర్కొంది. అంతేకాకుండా విభజన శక్తులకు వ్యతిరేకంగా పోరాడాలని తమ పార్టీ నిర్ణయానికి సుప్రీం (Supreme Court) వ్యాఖ్యలు ఎంతో బలాన్ని ఇస్తున్నాయని తెలిపింది. మహమ్మద్‌ ప్రవక్తపై అనుచిత వ్యాఖ్యలు చేసి తీవ్ర దుమారానికి తెరలేపిన నుపుర్‌ శర్మ తీరుపై సుప్రీంకోర్టు తీవ్ర ఆగ్రహం వ్యక్తం చేసిన నేపథ్యంలో కాంగ్రెస్‌ పార్టీ ఈ విధంగా స్పందించింది.

‘దేశవ్యాప్తంగా భావోద్వేగాలు రెచ్చగొట్టడానికి భాజపా అధికార ప్రతినిధి ఒక్కరే బాధ్యులని భారత అత్యున్నత న్యాయస్థానం స్పష్టంగా పేర్కొంది. ఇందుకు బాధ్యతగా దేశం మొత్తానికి ఆమె క్షమాపణ చెప్పాలంటూ సరైన రీతిలోనే చెప్పింది. సుప్రీం కోర్టు చేసిన ఈ ఘాటు వ్యాఖ్యలతో అధికార పార్టీ సిగ్గుతో తల దించుకోవాలి’ అని కాంగ్రెస్‌ జనరల్‌ సెక్రటరీ జైరాం రమేష్‌ పేర్కొన్నారు. వివిధ వర్గాల మనోభావాలను రెచ్చగొట్టడం వల్ల భాజపా ప్రయోజనం పొందుతుందనడంలో ఎటువంటి దాపరికం లేదన్న ఆయన.. విభజన శక్తులకు వ్యతిరేకంగా పోరాడుతోన్న ప్రతి ఒక్కరికీ సుప్రీం వ్యాఖ్యలు మరింత బలపరుస్తున్నాయని అన్నారు.

ఇదిలాఉంటే, ఓ టీవీ ఛానల్‌ చర్చా కార్యక్రమం సందర్భంగా మహమ్మద్‌ ప్రవక్తపై నుపుర్‌ శర్మ చేసిన వ్యాఖ్యలు దేశంలోనే గాక, అంతర్జాతీయంగా తీవ్ర వివాదానికి కారణమైన విషయం తెలిసిందే. దీంతో చర్యలకు ఉపక్రమించిన భాజపా.. ఆమెను సస్పెండ్‌ చేసింది. వివాదాస్పద వ్యాఖ్యలకు గానూ ఆమెపై దేశవ్యాప్తంగా పలుచోట్ల కేసులు నమోదయ్యాయి. అయితే, ఈ కేసులన్నింటినీ దిల్లీకి బదిలీ చేయాలంటూ నుపుర్‌ శర్మ దాఖలు చేసిన పిటిషన్‌ను విచారించిన సుప్రీం కోర్టు.. టీవీ చర్చలో ఆమె వ్యాఖ్యలను తప్పుబడుతూ తీవ్రంగా స్పందించింది.

Read latest India News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts