ISRO: SSLV ప్రయోగం అనుకున్న ఫలితాలు ఇవ్వలేదు..

శ్రీహరికోట: ఇస్రో కొత్తగా అభివృద్ధి చేసి తొలిసారి ప్రయోగించిన చిన్న ఉపగ్రహ వాహకనౌక (SSLV) ప్రయోగానికి ఆదిలోనే అవాంతరాలు ఎదురయ్యాయి. ఈవోఎస్‌-02, ఆజాదీశాట్‌ ఉపగ్రహాలను కక్ష్యలో ప్రవేశపెట్టడమే లక్ష్యంగా ఆదివారం జరిగిన ఈ ప్రయోగం అనుకున్న ఫలితాలను ఇవ్వలేదని ఇస్రో ఛైర్మన్‌ సోమనాథ్‌ వెల్లడించారు.

ఆదివారం ఉదయం 9.18 గంటలకు తిరుపతి జిల్ల్లా సతీశ్‌ ధావన్‌ స్పేస్‌ సెంటర్‌ (షార్‌)లోని మొదటి ప్రయోగవేదిక నుంచి ఎస్‌ఎస్‌ఎల్‌వీ (SSLV) నింగిలోకి దూసుకెళ్లింది. తొలి మూడు దశలు అనుకున్నట్లుగానే పూర్తయ్యాయి. కానీ, ఉపగ్రహాలను కక్ష్యలోకి ప్రవేశపెట్టే టెర్మనల్‌ దశలో సంబంధాలు తెగిపోయి సమాచారం లభ్యం కాలేదు. దీంతో తుది ఫలితాల్ని ప్రకటించడానికి ఇస్రో వాయిదా వేసింది. సమాచారాన్ని క్షుణ్నంగా పరిశీలించి ఉపగ్రహాలు నిర్దేశిత కక్ష్యలోకి చేరాయో.. లేదో.. ప్రకటిస్తామని సోమనాథన్‌ ఉదయం ప్రకటించారు

సమాచారాన్ని పూర్తిగా విశ్లేషించిన శాస్త్రవేత్తలు ఉపగ్రహాలు నిర్దేశించిన కక్ష్యలోకి కాకుండా ఇతర అస్థిర కక్ష్యలోకి చేరుకున్నట్లు గుర్తించామని ఇస్రో మధ్యాహ్నం వెల్లడించింది. దీంతో ఎస్‌ఎస్‌ఎల్‌వీ-డీ1 (SSLV-D1) పేరిట చేపట్టిన ఈ ప్రయోగ పూర్తిస్థాయి లక్ష్యాల్ని చేరుకోలేపోయామని తెలిపింది. ‘‘సెన్సార్ వైఫల్యాన్ని గుర్తించి, దాన్ని నివృత్తి చేయడంలో తలెత్తిన ఓ లాజిక్ వైఫల్యం’’ వల్లే ఈ సమస్య ఏర్పడినట్లు గుర్తించామని పేర్కొంది. దీంతో ఉపగ్రహాలు నిర్దేశించిన 356 కి.మీ వృత్తాకార కక్ష్యలోకి కాకుండా 356x76 కి.మీ వలయాకార కక్ష్యలోకి చేరాయని తెలిపింది. ఫలితంగా ఆ ఉపగ్రహాలు నిరుపయోగమైనట్లు వెల్లడించింది. 

ఈ ఘటనపై ఓ కమిటీని నియమిస్తామని ఇస్రో ప్రకటించింది. పూర్తిస్థాయిలో విశ్లేషణ చేసి కమిటీ సిఫార్సులు చేస్తుందని పేర్కొంది. వాటిని అమలు చేసి తిరిగి ఎస్‌ఎస్‌ఎల్‌వీ-డీ2 పేరిట ప్రయోగం చేపడతామని వెల్లడించింది.