Amit shah: భద్రతా వైఫల్యం.. అమిత్ షా కాన్వాయ్‌లోకి దూసుకొచ్చిన కారు..!

అగర్తల: కేంద్ర హోంశాఖ మంత్రి అమిత్ షా (Amit shah) త్రిపుర పర్యటనలో భద్రతా వైఫల్యం (Security lapse) చోటుచేసుకుంది. ఆయన కాన్వాయ్‌లోకి ఓ కారు వేగంగా దూసుకురావడం తీవ్ర అలజడి సృష్టించింది. అమిత్‌ షా అగర్తల ఎయిర్‌పోర్టుకు వెళ్తుండగా ఈ ఘటన చోటుచేసుకొంది. అధికారుల కథనం ప్రకారం..

త్రిపుర (Tripura) ముఖ్యమంత్రిగా మాణిక్‌ సాహా ప్రమాణస్వీకార కార్యక్రమానికి అమిత్ షా (Amit shah) బుధవారం హాజరయ్యారు. ఈ కార్యక్రమం ముగించుకొని తిరుగుపయనమవుతుండగా భద్రతా వైఫల్యం చోటుచేసుకుంది. నిన్న సాయంత్రం గెస్ట్‌ హౌస్‌ నుంచి అగర్తల (Agartala) విమానాశ్రయానికి అమిత్ షా కాన్వాయ్‌ వెళ్తుండగా.. ఆ మార్గంలో అధికారులు సాధారణ ట్రాఫిక్‌ను నిలిపివేశారు. అయితే, ఓ వ్యక్తి మాత్రం ఆగకుండా తన కారులో ముందుకొచ్చాడు. పోలీసులు ఆ కారును అడ్డుకునేందుకు ప్రయత్నించినప్పటికీ అతడు వేగంగా కాన్వాయ్‌ (Convoy)లోకి దూసుకురావడం కలకలం సృష్టించింది.

అయితే ఈ ఘటన కారణంగా ఎలాంటి ప్రమాదం జరగలేదని తెలుస్తోంది. కాగా.. దీనిపై పోలీసులు దర్యాప్తు ప్రారంభించారు. ఇంతవరకూ ఎవరినీ అరెస్టు చేయలేదని తెలుస్తోంది. మరోవైపు, ఈ ఘటనను కేంద్ర దర్యాప్తు సంస్థలు సీరియస్‌గా తీసుకున్నాయి. దీనిపై నివేదిక ఇవ్వాలని రాష్ట్ర పోలీసులను ఆదేశించినట్లు సమాచారం.

త్రిపురలో మరోసారి భాజపా ప్రభుత్వం కొలువుదీరింది. ముఖ్యమంత్రిగా మాణిక్‌ సాహా రెండోసారి ప్రమాణస్వీకారం చేశారు. ఈ కార్యక్రమానికి ప్రధాని మోదీ సహా, అమిత్ షా, భాజపా అధ్యక్షుడు జేపీ నడ్డా తదితరులు హాజరయ్యారు. ఇటీవల జరిగిన అసెంబ్లీ ఎన్నికల్లో ఈ రాష్ట్రంలో భాజపా కూటమి 32 స్థానాల్లో విజయం సాధించిన విషయం తెలిసిందే.