MLAs Dance: మహారాష్ట్ర సీఎంగా శిందే.. ఎగిరి గంతులేసిన రెబల్‌ ఎమ్మెల్యేలు

వైరల్‌గా మారిన వీడియోలు

ముంబయి: మహారాష్ట్రలో (Maharashtra) నెలకొన్న రాజకీయ అస్థిరతకు అనూహ్య పరిణామాలతో చివరకు ముగింపు పడింది. ఏక్‌నాథ్‌ శిందే (Eknath Shinde)కు పూర్తి మద్దతు ఇవ్వడంతోపాటు ఆయనే కొత్త ముఖ్యమంత్రిగా బాధ్యతలు చేపడతారని భాజపా నేత దేవేంద్ర ఫడణవీస్‌ ప్రకటించడం రెబల్‌ ఎమ్మెల్యేలతో పాటు అందర్నీ ఆశ్చర్యానికి గురిచేసింది. తమ నేత ముఖ్యమంత్రి కాబోతున్నారనే వార్తను మీడియాలో చూసిన శిందే వర్గం ఎమ్మెల్యేలు సంతోషంతో ఉబ్బితబ్బిపోయారు. గోవా హోటల్‌లో ఉన్న రెబల్‌ నేతలంతా ఈ వార్త విని ఎగిరి గెంతులేశారు. కొంతమంది ఎమ్మెల్యేలు ఏకంగా టేబుళ్లపైకి ఎక్కి నృత్యాలు చేస్తున్న దృశ్యాలు సామాజిక మాధ్యమాల్లో వైరల్‌గా మారాయి.

శివసేన నాయకత్వంపై తిరుగుబాటు చేసిన ఎమ్మెల్యేలు తొలుత గుజరాత్‌, అక్కడనుంచి అస్సాం హోటళ్లలో క్యాంపు వేశారు. తొమ్మిది రోజుల అనంతరం.. తాజాగా బలపరీక్ష నిరూపించుకోవాలని గవర్నర్‌ ఆదేశాలు ఇచ్చిన నేపథ్యంలో వారంతా ముంబై రావాలని నిశ్చయించుకున్నారు. దీంతో తమ క్యాంపును గుహవాటి నుంచి గోవాలోని ఓ హోటల్‌కు మార్చారు. అదే సమయంలో మహారాష్ట్ర ముఖ్యమంత్రి ఉద్ధవ్‌ ఠాక్రే రాజీనామా చేయడంతో రాజకీయ పరిణామాలు పూర్తిగా మారిపోయాయి. రెబల్‌ నేతలు గోవాలోనే ఉండిపోవడంతో వారికి నాయకత్వం వహిస్తోన్న ఏక్‌నాథ్‌ శిందే మాత్రం గురువారం మధ్యాహ్నం ముంబయికి చేరుకున్నారు. తొలుత భాజపా నేత దేవేంద్ర ఫడణవీస్‌తో చర్చించిన అనంతరం గవర్నర్‌ను కలిసి నూతన ప్రభుత్వాన్ని ఏర్పాటు చేస్తున్నట్లు వెల్లడించారు. అదే సమయంలో ముఖ్యమంత్రిగా ఏక్‌నాథ్‌ శిందేనే ప్రమాణస్వీకారం చేస్తారని ఫడణవీస్‌ ప్రకటించడంతో రెబల్‌ ఎమ్మెల్యేలు ఒక్కసారిగా ఆశ్చర్యానికి గురయ్యారు. సీఎంగా ఫడణవీస్‌.. ఉపముఖ్యమంత్రిగా శిందే ఉంటారనే ఊహాగాలు వచ్చినప్పటికీ.. చివరకు శిందేనే సీఎం కావడంతో రెబల్‌ ఎమ్మెల్యేలు సంతోషంతో ఎగిరి గంతులేశారు.