Zomato: జొమాటో ప్రకటన వివాదం.. హృతిక్‌ రోషన్‌ నటించిన ఆ యాడ్‌ తొలగింపు

దిల్లీ: ప్రముఖ ఫుడ్‌ డెలివరీ సంస్థ జొమాటో రూపొందించిన ఓ ప్రకటన వివాదాస్పదమైంది. బాలీవుడ్‌ స్టార్‌ హృతిక్‌ రోషన్‌ నటించిన ఓ యాడ్‌ను పూజారులు వ్యతిరేకించడంతో వెనక్కి తగ్గిన జొమాటో దాన్ని తొలగించింది. ఎవరి మనోభావాలను దెబ్బతీయడం తమ ఉద్దేశం కాదని, క్షమించాలని కోరుతూ ఆ ప్రకటనను వెనక్కి తీసుకుంటున్నట్లు ప్రకటించింది.

‘మహాకాళ్‌’ నుంచి జొమాటోలో ‘థాలి’ని తెప్పించుకొని తినేస్తా.. అని హృతిక్‌ రోషన్‌ చెప్పే ఓ ప్రకటనను ఆ సంస్థ కొద్దిరోజుల క్రితం విడుదల చేసింది. అయితే యాడ్‌లో ‘మహాకాళ్‌’ పదాన్ని వినియోగించడంపై మధ్యప్రదేశ్‌ ఉజ్జయినిలోని మహాకాళేశ్వర ఆలయ పూజారులు వ్యతిరేకించారు. అది ఓ వర్గం ప్రజల మనోభావాలను దెబ్బతీసేలా ఉందని, వెంటనే తొలగించాలని డిమాండ్‌ చేశారు. ఈ అంశంపై ఉజ్జయిని కలెక్టర్‌, మహాకాళ్‌ ఆలయ ఛైర్మన్‌ ఆశిష్‌ సింగ్‌కు ఫిర్యాదు చేసినట్లు కూడా తెలిపారు.

ఈ యాడ్‌పై వివాదం చెలరేగిన నేపథ్యంలో జొమాటో స్పందించింది. ఆ ప్రకటనను వెనక్కి తీసుకుంటున్నట్లు వెల్లడించింది. అయితే, ఎవరి మనోభావాలను దెబ్బతీయడం తమ ఉద్దేశం కాదని, మహాకాళ్‌ ఉజ్జయినిలోని ఓ ప్రముఖ రెస్టారెంట్‌ పేరు అని పేర్కొంది. దాన్ని ఉద్దేశించే ఆ యాడ్‌ను రూపొందించినట్లు తెలిపింది. పాన్ ఇండియా ప్రచారంలో భాగంగా ప్రతి నగరంలోని జనాదరణ పొందిన లోకల్ రెస్టారెంట్లు, వాటి ఉత్తమ వంటకాలను గుర్తించామని.. మహాకాళ్‌ రెస్టారెంట్‌లో లభించే ‘థాలి’ని ఉద్దేశించి ఆ యాడ్‌ను రూపొందించినట్లు వివరణ ఇచ్చింది.