LAC: వాస్తవాధీన రేఖ వద్ద పరిస్థితిని అంచనా వేయలేం: ఆర్మీ చీఫ్‌

ఇంటర్నెట్‌డెస్క్‌: వాస్తవాధీన రేఖ (ఎల్‌ఏసీ) వద్ద పరిస్థితి ఇప్పటికి నిలకడగానే ఉన్నా.. ఎప్పుడు ఏం జరుగుతుందో చెప్పలేమని ఆర్మీచీఫ్‌ జనరల్‌ మనోజ్‌పాండే పేర్కొన్నారు. ‘ది చాణక్య డైలాగ్స్‌’ నిర్వహించిన ఓ సదస్సులో ఆయన మాట్లాడారు. వివాదాస్పదమైన ఏడు ప్రదేశాల్లో.. నాలుగు చోట్ల సమస్య పరిష్కారమైందని, మిగిలిన రెండింటిపై దృష్టిపెట్టామని తెలిపారు. కానీ, వాస్తవాధీన రేఖ వద్ద చైనా బలగాల ఉపసంహరణ మాత్రం జరగడంలేదని వెల్లడించారు. ‘‘ప్రస్తుతం రెండు పక్షాల మధ్య దౌత్య, రాజకీయ, సైనిక స్థాయుల్లో చర్చలు జరుగుతున్నాయి. ఇలాంటి చర్చల వల్లే మనం ఐదు చోట్ల పరిష్కారాలు కనుగొన్నాం’’  అని పాండే చెప్పారు.

అక్టోబర్‌ 15వ తేదీన ఇండో-చైనా సరిహద్దు వ్యవహారాలపై ఏర్పడ్డ డబ్ల్యూఎంసీసీ 25వ విడత సమావేశాల వివరాలను పాండే వెల్లడించారు. దీనిలో కోర్‌ కమాండర్‌ స్థాయిలో 17వ విడత భేటీ నిర్వహించడంపై చర్చలు నిర్వహించినట్లు పేర్కొన్నారు. చర్చల వల్లే పరిష్కారం లభిస్తుందన్నారు. ‘‘కేవలం శిక్షణ కోసం వచ్చిన కొన్ని బ్రిగేడ్లు మాత్రమే వెనక్కివెళ్లాయి. ఎల్‌ఏసీని దృష్టిలో పెట్టుకొని చూస్తే మాత్రం పెద్దగా బలగాల సంఖ్యలో తగ్గుదల ఏమీ లేదు’’ అని పాండే వెల్లడించారు. భారత్‌ వైపు నుంచి మౌలిక వసతుల కల్పన , అభివృద్ధి కార్యక్రమాలు నిరాటంకంగా కొనసాగుతున్నాయని వెల్లడించారు. భారత్‌ అవసరమైన ప్రదేశాలకు వెంటనే అదనపు బలగాలను పంపడానికి ఏర్పాట్లు జరిగినట్లు వెల్లడించారు. ఎటువంటి పరిస్థితులనైనా ఎదుర్కొనేందుకు రిజర్వు బలగాలను సిద్ధంగా ఉంచినట్లు తెలిపారు.