Udaipur Murder: ఉదయ్‌పుర్‌ దర్జీ హత్య.. స్లీపర్‌ సెల్స్‌ పనేనా?

కేసు దర్యాప్తు ఎన్‌ఐఏకు అప్పగింత

దిల్లీ: రాజస్థాన్‌లోని ఉదయ్‌పుర్‌లో పట్టపగలే దర్జీ దారుణ హత్య తీవ్ర దుమారానికి దారితీసింది. ఈ ఘటన నేపథ్యంలో రాష్ట్ర ప్రభుత్వంపై విపక్షాలు తీవ్ర స్థాయిలో మండిపడుతున్నాయి. నిందితులను కఠినంగా శిక్షించాలని డిమాండ్‌ చేస్తున్నాయి. కాగా.. ఈ హత్య పాక్‌ ఉగ్ర ముఠాకు చెందిన స్లీపర్‌ సెల్స్‌ చేసి ఉంటాయనే అనుమానాలు వ్యక్తమవుతున్నాయి.

పాకిస్థాన్‌ ఆధారంగా పనిచేస్తోన్న ఓ తీవ్రవాద సంస్థకు చెందిన స్లీపర్‌ సెల్‌ ఈ దారుణ ఘటనకు పాల్పడిందని నిఘా వర్గాలు సమాచారమిచ్చినట్లు తెలుస్తోంది. దీంతో ఆ దిశగా దర్యాప్తు చేపట్టే అవకాశముంది. ఈ కేసులో ఇప్పటివరకు ముగ్గురు అనుమానితులను అరెస్టు చేయగా.. మరో 10 మందిని విచారిస్తున్నారు.

ఎన్‌ఐఏ చేతికి దర్యాప్తు..

ఇదిలా ఉండగా.. ఈ కేసు దర్యాప్తు బాధ్యతలను కేంద్ర హోంశాఖ.. జాతీయ దర్యాప్తు సంస్థకు అప్పగించింది. ఈ మేరకు హోంశాఖ ట్విటర్‌లో వెల్లడించింది. ఈ హత్య కేసులో ముమ్మర దర్యాప్తు చేపట్టాలని ఆదేశించింది. దీని వెనుక ఏదైనా అంతర్జాతీయ ఉగ్ర ముఠా హస్తం ఉందా అనే కోణంలోనూ లోతుగా విచారణ చేపట్టాలని ఎన్‌ఐఏకు సూచించింది.

ఓ మతాన్ని అవమానించాడన్న ఆరోపణలతో ఉదయ్‌పుర్‌కు చెందిన కన్హయ్యలాల్‌ను పట్టపగలే ఇద్దరు వ్యక్తులు అతి కిరాతకంగా నరికి చంపారు. ఆ వీడియోను సామాజిక మాధ్యమాల్లో పోస్ట్‌ చేయడమేగాక.. ప్రధానిని కూడా చంపేస్తామంటూ బెదిరింపులకు పాల్పడ్డారు. దీంతో ఈ ఘటన రాష్ట్రవ్యాప్తంగా తీవ్ర ఉద్రిక్తతలకు దారితీసింది. హత్యను ఖండిస్తూ కొన్ని చోట్ల జరిగిన ఆందోళనలు హింసాత్మకంగా మారాయి. దీంతో నగరానికి అదనపు పోలీసులను రప్పించి భద్రతను కట్టుదిట్టం చేశారు.

ఈ ఘటనను పలువురు రాజకీయ ప్రముఖులు తీవ్రంగా ఖండించారు. అతివాదం, హింస ఏ రూపంలో ఉన్నా దాన్ని ఎప్పటికీ అంగీకరించకూడదని పశ్చిమ బెంగాల్‌ ముఖ్యమంత్రి మమతా బెనర్జీ ట్వీట్‌ చేశారు. ఉదయ్‌పుర్‌ ఘటనను తాను తీవ్రంగా ఖండిస్తున్నానని తెలిపారు. చట్టం తన పని తాను చేసుకుపోతుందని, ప్రజలంతా శాంతియుతంగా ఉండాలని కోరారు.