SpiceJet: టేకాఫ్‌ సమయంలో స్తంభాన్ని ఢీకొన్న స్పైస్‌జెట్‌ విమానం

దిల్లీ: స్పైస్‌జెట్‌ విమానం స్వల్ప ప్రమాదానికి గురైంది. టేకాఫ్‌కు వెళ్లే క్రమంలో విమానం అక్కడి విద్యుత్తు స్తంభాన్ని ఢీకొట్టింది. దీంతో విమానం స్వల్పంగా ధ్వంసమైంది. ఈ ఘటన సోమవారం దిల్లీ ఎయిర్‌పోర్ట్‌లో జరిగింది. బోయింగ్ 737-800 విమానం ప్రయాణికులను ఎక్కించుకున్న తర్వాత ప్యాసింజర్ టెర్మినల్ నుండి రన్‌వేకి వెళుతుండగా ఈ ప్రమాదం జరిగిందని అధికార వర్గాలు తెలిపాయి. జమ్మూకి వెళ్లేందుకు సిద్ధమైన ఈ విమానం ప్రమాదానికి గురికావడంతో దాని కుడి రెక్క స్పల్పంగా ధ్వంసమైంది. దీంతో ఐలెరాన్ దెబ్బతింది. ఆ స్తంభం కూడా విరిగిపోయింది. ప్రమాదంలో ఎవరికీ ఎలాంటి గాయాలు కాలేదని, ప్రయాణికులను మరో విమానంలో తరలించినట్లు విమానాశ్రయ అధికారులు పేర్కొన్నారు. ఈ ఘటనపై దర్యాప్తు ప్రారంభించినట్లు తెలిపారు.