SpiceJet: స్పైస్‌జెట్‌కు డీజీసీఏ షాక్‌.. 50శాతం విమానాలనే నడపాలంటూ ఆదేశం

దిల్లీ: విమానాల్లో వరుస సాంకేతిక సమస్యలు తలెత్తుతున్న స్పైస్‌జెట్‌ (SpiceJet) విమానయాన సంస్థకు డైరెక్టర్‌ జనరల్‌ ఆఫ్‌ సివిల్‌ ఏవియేషన్‌ (DGCA) షాకిచ్చింది. ఎనిమిది వారాలపాటు స్పైస్‌జెట్‌ విమానాలను 50శాతం మాత్రమే నడపాలంటూ డీజీసీఏ ఆంక్షలు విధించింది. ప్రయాణికుల నుంచి  ఫిర్యాదులు అందడంతో ఈ చర్యలు చేపట్టింది. ‘‘తక్షణ తనిఖీలు, దర్యాప్తులు, ప్రయాణికుల నుంచి ఫిర్యాదుల అనంతరం సురక్షితమైన, నమ్మదగిన విమాన సేవలను కొనసాగించేందుకు.. స్పైస్‌జెట్ విమాన సర్వీసుల సంఖ్యను ఎనిమిది వారాలపాటు 50శాతానికి పరిమితం చేస్తున్నాం’’ అని డీజీసీఏ ఓ ప్రకటనలో తెలిపింది.

ఇటీవల 18 రోజుల వ్యవధిలో ఎనిమిది స్పైస్‌జెట్‌ (SpiceJet)విమానాల్లో సాంకేతిక సమస్యలు వెలుగుచూశాయి. ఈ నేపథ్యంలోనే డీజీసీఏ ఆంక్షలు విధించింది. ఇటీవలి కాలంలో ఓ విమానయాన సంస్థపై రెగులేటరీ సంస్థ తీసుకున్న కఠిన నిర్ణయం ఇదే.

జులై 5న చైనాకు వెళుతున్న స్పైస్‌జెట్‌ విమానం రాడార్‌ పనిచేయకపోవడంతో కోల్‌కతాకు తిరుగు ప్రయాణమైంది. అదే రోజు దిల్లీ-దుబాయి విమానాన్ని ఫ్యూయల్‌ ఇండికేటర్‌లో లోపం కారణంగా కరాచీలో అత్యవసరంగా లాండ్‌ చేయాల్సి వచ్చింది. అంతకుముందు ఓ విమానంలో పొగలు రాగా.. మరో విమానం ఇంజిన్‌లో మంటలు చెలరేగాయి. ఇలా వరుస ఘటనల నేపథ్యంలో స్పైస్‌జెట్‌ విమానాలపై విమర్శలు వెల్లువెత్తాయి.