పిల్లితో గూఢచర్యం: విఫలయత్నం.. కోట్లు ఖర్చు

ఇంటర్నెట్‌ డెస్క్‌: గూఢచర్యం ఎంతో సాహసోపేతమైన పని. శత్రువులు ఉండే ప్రాంతానికి వెళ్లి వారి రహస్యాలను కనిపెట్టడం అంటే అంత సులువు కాదు. అందుకే మనుషులకు బదులు ఇతర ప్రత్యామ్నాయాలు ఆన్వేషిస్తుంటారు. ఈ క్రమంలో పిల్లులతో గూఢచర్యం చేయించాలని గతంలో యూఎస్‌ సెంట్రల్‌ ఇంటెలిజెన్స్‌ ఏజెన్సీ(సీఐఏ)లో భాగమైన డైరెక్టరేట్‌ ఆఫ్‌ సైన్స్‌ అండ్‌ టెక్నాలజీ భావించింది. ఇందుకోసం రూ. కోట్లు ఖర్చు చేసింది. అయినా వారి ప్రయత్నం విఫలం కావడంతో.. పిల్లులతో పనిచేయించుకోవడం కష్టమని అధికారులు ఆ ప్రాజెక్టును నిలిపివేశారు. 

1960లో సీఐఏలోని డైరెక్టరేట్‌ ఆఫ్‌ సైన్స్‌ అండ్‌ టెక్నాలజీ విభాగం ‘ఎకస్టిక్‌ కిట్టీ’ పేరుతో ఓ ప్రాజెక్టును చేపట్టింది. వాషింగ్టన్‌ డీసీలోని అప్పటి సోవియేట్‌ ఎంబసీ, మాస్కోలోని క్రెమ్లిన్‌ భవనంలో పిల్లుల సహాయంతో అక్కడి వారు ఏం మాట్లాడుకుంటున్నారో తెలుసుకోవడం ఈ ప్రాజెక్టు ఉద్దేశం. ఇందులో భాగంగా ఒక పిల్లికి వైద్యులు శస్త్రచికిత్స చేసి దాని చెవుల వద్ద మైక్రోఫోన్‌, తలలో రేడియో ట్రాన్స్‌మీటర్‌, వెన్నెముకకు ఓ వైర్‌ అమర్చారు. తొలి ప్రయత్నంగా వాషింగ్టన్‌ డీసీలోని సోవియేట్‌ ఎంబసీ ప్రాంగణంలో ఇద్దరు అధికారులు మాట్లాడుకుంటున్న మాటలు వినాలని.. ఆ పిల్లిని పార్క్‌ వద్ద వదిలేశారు. సాధారణంగా పిల్లులు మన మాట వినవు. చాలా తొందరగా ప్రవర్తనను మార్చేసుకుంటాయి. సీఐఏ వదిలిన పిల్లి కూడా సహజంగానే చేయాల్సిన పనిని వదిలేసి రోడ్డుపైకి పరుగెత్తడంతో ఓ ట్యాక్సీ కింద పడి మృతి చెందింది. ఈ ప్రాజెక్టు కోసం సీఐఏ అప్పట్లోనే 20 మిలియన్‌ డాలర్లు(దాదాపు రూ.150 కోట్లు ) ఖర్చు చేసిందట. ఆ తర్వాత పలు పిల్లులకు శిక్షణ ఇచ్చి చేసిన ప్రయత్నాలు కూడా విఫలం కావడంతో ప్రాజెక్టును 1967లో నిలిపివేయగా.. 2001లో పూర్తిగా మూసివేసినట్లు అధికారికంగా ప్రకటించారు. 

1967లో ప్రాజెక్టును మూసివేస్తున్నప్పుడు సీఐఏ పరిశోధకులు ఓ వివరణ ఇచ్చారు. ‘‘పిల్లులతో తక్కువ దూరంలో పనిచేయించుకోగలమని నమ్ముతున్నాం. కానీ విదేశాల్లో పిల్లులతో గూఢచర్యం అంత ఆచరణయోగ్యం కాదు’’అని వెల్లడించారు. అయితే ఈ ప్రాజెక్టు ఆగిపోవడానికి కారణాన్ని సీఐఏలో పనిచేసిన ఉన్నతాధికారి రాబర్ట్‌ వాలెస్‌ 2013లో వెల్లడించారు. ‘‘పిల్లులు మనకు కావాల్సినట్లు ప్రవర్తించేలా శిక్షణ ఇవ్వడం, అలాగే పిల్లిలో అమర్చిన పరికరాలు తిరిగి తీసుకొని దాన్ని బతికించడం కష్టతరం’’అని చెప్పారు.