Booster Dose: బూస్టర్‌ డోసు పంపిణీ ముమ్మరంగా చేపట్టండి.. రాష్ట్రాలకు కేంద్రం సూచన

ఆగస్టు 15 నాటికి లబ్ధిదారుల్లో కేవలం 17శాతం మంది మాత్రమే బూస్టర్‌ డోసు తీసుకున్నట్లు కేంద్ర ఆరోగ్యశాఖ మంత్రి మన్‌సుఖ్‌ మాండవీయ పేర్కొన్నారు.

Published : 16 Aug 2022 22:32 IST

దిల్లీ: దేశంలో కరోనా ఉద్ధృతి కొనసాగుతున్న వేళ.. ప్రికాషన్‌ డోసు (Booster Dose) పంపిణీని కేంద్ర ప్రభుత్వం నెల క్రితం ఉచితంగా ప్రారంభించింది. అయితే, ఆగస్టు 15 నాటికి లబ్ధిదారుల్లో కేవలం 17శాతం మంది మాత్రమే బూస్టర్‌ డోసు తీసుకున్నట్లు కేంద్ర ఆరోగ్యశాఖ మంత్రి మన్‌సుఖ్‌ మాండవీయ పేర్కొన్నారు. ఈ నేపథ్యంలో రాష్ట్రాలు, కేంద్రపాలిత ప్రాంతాల ఆరోగ్యశాఖ మంత్రులతో వర్చువల్‌గా సమీక్ష నిర్వహించిన ఆయన.. ప్రికాషన్‌ డోసు (Booster Dose) పంపిణీని మరింత ముమ్మరంగా చేపట్టాలని సూచించారు.

దేశంలో కరోనా వ్యాక్సిన్‌ పంపిణీ మందకొడిగా సాగుతోందన్న మన్‌సుఖ్‌ మాండవీయ.. దేశీయ వ్యాక్సిన్‌ కార్బొవాక్స్‌ను అందుబాటులో ఉండేలా చూసుకోవాలని సూచించారు. ముఖ్యంగా రైల్వే స్టేషన్లు, ఎయిర్‌పోర్టులు, ప్రార్థనా మందిరాలతో పాటు బహిరంగ ప్రదేశాల్లో బూస్టర్‌ డోసు పంపిణీని విస్తృతంగా చేపట్టాలని స్పష్టం చేశారు. ప్రికాషన్‌ డోసును తొలుత ప్రైవేటు కేంద్రాల్లోనే అందించగా.. జులై 14 వరకు కేవలం 8శాతం మాత్రమే తీసుకున్నారని చెప్పారు. అనంతరం ప్రభుత్వం ఉచితంగా పంపిణీ చేస్తున్నప్పటికీ ఆగస్టు 15 నాటికి ఇది 17శాతానికి మాత్రమే పెరిగిందన్నారు. ఈ నేపథ్యంలో బూస్టర్‌ డోసును విస్తృతంగా అందించాలని అన్ని రాష్ట్రాలకు సూచించారు.

భారత్‌ 75వ స్వాతంత్ర్య వేడుకలు జరుపుకొంటున్న సందర్భంగా ప్రికాషన్‌ డోసు పంపిణీ కార్యక్రమాన్ని 75రోజుల పాటు ప్రత్యేకంగా చేపట్టాలని కేంద్ర ప్రభుత్వం సంకల్పించింది. ఇందులో భాగంగా జులై 15వ తేదీ నుంచి అన్ని ప్రభుత్వ వ్యాక్సిన్‌ కేంద్రాల్లో మూడో డోసును (Booster Dose) ఉచితంగా అందిస్తోంది. అయినప్పటికీ ఆగస్టు 15నాటికి కేవలం 12కోట్ల మంది మాత్రమే మూడో డోసు తీసుకున్నారు. అర్హులకు సరిపోయే వ్యాక్సిన్‌లను అందుబాటులో ఉంచుతున్నామన్న కేంద్రం.. వాటి వినియోగ గడువు ఆధారంగా వ్యాక్సిన్‌ పంపిణీ చేపట్టాలని అన్ని రాష్ట్రాలకు సూచించింది.

Read latest India News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts