Supremecourt: న్యాయమూర్తిని ‘ఉగ్రవాది’ అంటావా!

కక్షిదారుకు నోటీసు జారీ చేసిన సుప్రీంకోర్టు

దిల్లీ: ప్రజా సర్వీసులకు సంబంధించిన ఓ కేసు విచారణ సందర్భంగా కక్షిదారు.. ఓ న్యాయమూర్తిని ‘ఉగ్రవాది’గా సంబోధిస్తూ ఆరోపణలు చేయడంపై సుప్రీంకోర్టు శుక్రవారం ఆగ్రహం వ్యక్తం చేసింది. ఆ కక్షిదారుకు షోకాజ్‌ నోటీసు జారీ చేయాల్సిందిగా రిజిస్ట్రీని ఆదేశించింది. ‘కొన్ని నెలలు నిన్ను జైలుకు పంపితే అప్పుడు తెలిసి వస్తుంది’ అని ప్రధాన న్యాయమూర్తి జస్టిస్‌ డీవై చంద్రచూడ్‌, జస్టిస్‌ హిమా కొహ్లీల ధర్మాసనం అతడిపై ఆగ్రహం వ్యక్తం చేసింది.  న్యాయవాది సూచన మేరకు బేషరతు క్షమాపణ చెప్పిన  కక్షిదారు తాను తీవ్రమైన మానసిక ఒత్తిడిలో ఉన్నట్లు కోర్టుకు నివేదించారు. ఈ నేరానికి కోర్టు ధిక్కారం కింద నిన్ను ఎందుకు విచారించకూడదో చెప్పాలని నోటీసు జారీ చేస్తామని ధర్మాసనం పేర్కొంది. ఈ కేసు మూడు వారాలకు వాయిదా పడింది.