Taiwan: చైనాను ఎదిరించావు.. నీకు నేనున్నాను..!

 లిథువేనియాకు తైవాన్‌ మద్దతు

ఇంటర్నెట్‌డెస్క్‌: చైనాను ఎదిరించి తైవాన్‌కు మద్దతుగా నిలిచినందుకు చిరు బాల్టిక్‌ దేశం లిథువేనియాపై ఒత్తిడి పెరుగుతోంది. ఆ దేశ ఆల్కహాల్‌ పరిశ్రమ తీవ్ర సమస్యలు ఎదుర్కొంటోంది. డిసెంబర్‌లో చైనాకు ఎగుమతి అయిన పొగాకు, రమ్‌ను అక్కడి అధికారులు నిలిపివేశారు. ఈ సమయంలో ఆ దేశాన్ని ఆదుకొనేందుకు తైవాన్‌ ముందుకొచ్చింది. లిథువేనియా నుంచి 20,000 వేల బాటిళ్ల రమ్‌ను కొనుగోలు చేసినట్లు తైవాన్‌ టొబాకో అండ్‌ లిక్కర్‌ (టీటీఎల్‌) ప్రకటించింది. వాటిని ఇప్పటికే తైవాన్‌ చేర్చినట్లు పేర్కొంది. ‘‘లిథువేనియా మా దేశానికి మద్దతు ఇచ్చింది.. మేము వారికి మద్దతు ఇస్తున్నాం’’ అని టీటీఎల్‌ ఒక ప్రకటనలో పేర్కొంది. టీటీఎల్‌ తైవాన్‌ ప్రభుత్వ రంగ సంస్థ. 

ఐరోపా సమాఖ్యలోని చిన్న దేశమైన లిథువేనియా చైనాకు ఎదురొడ్డి నిలిచింది. 2012లో చైనా ఏర్పాటు చేసిన 17+1 సంఘం(సీఈఈసీ) నుంచి ఈ ఏడాది బయటకు వచ్చేసింది.  అంతేకాదు తైవాన్‌లో ప్రతినిధుల కార్యాలయాన్ని తెరుస్తామని మార్చిలో ప్రకటించడంతో చైనా మండిపడింది. దీంతో లిథువేనియాతో దౌత్య సంబంధాల స్థాయిని తగ్గించుకొంది. ఇటీవల తైవాన్‌ ప్రతినిధుల కార్యాలయం తెరిచేందుకు  ఆ దేశం అంగీకరించింది. నవంబర్‌ 18వ తేదీన ఈ కార్యాలయం లిథువేనియా రాజధాని విల్నియస్‌లో తెరుచుకొంది. ‘తైపీ’ కాకుండా ‘తైవాన్‌’ ప్రతినిధుల పేరిట ఈ కార్యాలయం ఏర్పాటైంది.  నవంబర్‌ 29న ఆ దేశ ప్రతినిధులు తైవాన్‌లో జరిగిన ఓపెన్‌ పార్లమెంట్‌ ఫోరంలో పాల్గొనడం కూడా డ్రాగన్‌కు కంటగింపుగా మారింది.