Tamil Nadu: చెరువులో దాక్కున్న నేరస్థుడిని పట్టించిన డ్రోన్ కెమెరా..

చెన్నై: చెరువులో దాక్కున్న నేరస్థుడిని డ్రోన్ కెమెరాలను ఉపయోగించి పోలీసులు అరెస్టు చేసిన ఘటన తమిళనాడులో జరిగింది. తెన్కాసి జిల్లాకు చెందిన జకుల్ హమీద్ అనే వ్యక్తిపై పలు పోలీస్‌స్టేషన్‌లలో క్రిమినల్ కేసులు ఉన్నాయి. ఈ క్రమంలో ఎవరికీ కనిపించకుండా పచనాయకంపొట్టై పరిసరాల్లో హమీద్ నివాసం ఏర్పాటు చేసుకున్నాడు. తన వద్దకు ఎవరూ రావద్దంటూ స్థానికులను బెదిరించాడు. ఈ క్రమంలో పశువులను మేపుతూ అటుగా వెళ్లిన ఓ వ్యక్తిపై హమీద్ కత్తితో దాడి చేశాడు. హత్యాయత్నం కేసు నమోదు చేసిన పోలీసులు.. అతడి కోసం వెళ్లారు. దీంతో అతడు చెరువు వైపు వెళ్లి కనిపించకుండా పోయాడు. హమీద్ చెరువులోనే నక్కినట్లు అంచనాకు వచ్చిన పోలీసులు.. డ్రోన్ కెమెరాలతో గాలించారు. చెరువు మధ్యలో.. పొదల్లో నక్కిన హమీద్‌ను డ్రోన్ కెమెరా గుర్తించింది. అతడు పారిపోయేందుకు ప్రయత్నించినప్పటికీ.. అప్పటికే అక్కడ కాపు కాసి ఉన్న పోలీసులు అతడిని అదుపులోకి తీసుకున్నారు.