విద్యార్థినితో పెళ్లి కోసం.. పురుషుడిగా మారిన టీచర్‌

భరత్‌పుర్‌: రాజస్థాన్‌లోని భరత్‌పుర్‌కు చెందిన మీరా స్థానిక ప్రభుత్వ పాఠశాలలో పీఈటీగా పనిచేసేవారు. అదే పాఠశాలలో చదువుతున్న కల్పన అనే అమ్మాయితో మీరాకు స్నేహం ఏర్పడింది. అది కాస్తా క్రమక్రమంగా ప్రేమగా మారింది. దీంతో కల్పనను వివాహం చేసుకునేందుకు మీరా లింగ మార్పిడి శస్త్ర చికిత్స చేయించుకున్నారు. ఆ తర్వాత ఆరవ్‌ కుంతల్‌గా పేరు మార్చుకున్నారు. వీరి ప్రేమ గురించి ఇరువురి ఇంట్లో చెప్పి ఒప్పించారు. పెద్దల అంగీకారంతో రెండు రోజుల క్రితం వివాహబంధంతో ఒక్కటయ్యారు.

‘‘ప్రేమలో ఏదైనా కరెక్టే. అందుకే నేను లింగమార్పిడి చేయించుకున్నాను. స్కూల్లో ప్లే గ్రౌండ్‌లో కల్పనతో నా పరిచయం ప్రేమగా మారింది. నాకు నలుగురు అక్కలు. నేను అమ్మాయిగా పుట్టినప్పటికీ.. అబ్బాయిగా ఉండాలనే అనిపించేది. చిన్నప్పటి నుంచి అలాగే ప్రవర్తించా. అందుకే లింగమార్పిడి చేయించుకోవాలనుకున్నా. ఇదే విషయాన్ని కల్పనతో చెప్పా. 2019 డిసెంబరులో నా తొలి శస్త్రచికిత్స జరిగింది. ఈ ప్రక్రియలో నేను కొన్ని ఇబ్బందులు ఎదుర్కొన్నా. చివరకు నా ప్రయత్నం ఫలించింది. మా ఇంట్లో వాళ్లు కూడా అంగీకరించడంతో మేమిద్దం ఒక్కటయ్యాం’’ అని మీరా అలియాస్‌ ఆరవ్‌ మీడియాకు తెలిపారు.

ఈ సందర్భంగా కల్పన మాట్లాడుతూ.. ‘‘తనంటే నాకు చాలా ఇష్టం. ఈ సర్జరీ చేయించుకోకపోయినా నేను తనని పెళ్లి చేసుకునేదాన్ని’’ అని తెలిపింది. రాష్ట్ర స్థాయి కబడ్డీ క్రీడాకారిణి అయిన కల్పన.. వచ్చే ఏడాది జనవరిలో అంతర్జాతీయ కబడ్డీ టోర్నమెంట్‌ కోసం దుబాయి వెళ్లేందుకు సిద్ధమవుతోంది.