127వ ఏట కన్నుమూసిన వృద్ధుడు.. అత్యధిక కాలం జీవించిన వ్యక్తిగా రికార్డుల్లోకి!

ప్రపంచంలోనే అత్యధికకాలం జీవించిన వ్యక్తిగా ఆఫ్రికాలోని ఎరిత్రియాకు చెందిన నటాబే తిన్స్యూ చరిత్ర సృష్టించబోతున్నారు. కాకపోతే, చనిపోయిన తర్వాత! ఇప్పటివరకూ ఈ రికార్డు జపాన్‌కు చెందిన జిరోమోన్‌ కిమురా (116) పేరున ఉంది. అయితే, నటాబే 127 ఏళ్ల వయసులో గత సోమవారం కాలం చేశారు. ఆయన వయసుకు సంబంధించిన వివరాలను కుటుంబ సభ్యులు గిన్నిస్‌ వరల్డ్‌ రికార్డ్స్‌ నిర్వాహకుల దృష్టికి తీసుకెళ్లారు. తన తాత 1894లో జన్మించాడంటూ నటాబే మనవడు జీర్‌ అధికారిక ధ్రువపత్రాన్ని కూడా అందించాడు. ఇందుకు సంబంధించిన వివరాలను గిన్నిస్‌ నిర్వాహకులు పరిశీలిస్తున్నారు. పశువుల కాపరిగా పనిచేసిన నటాబే 1934లో వివాహం చేసుకున్నారు. ఆయన భార్య కూడా ఎక్కువ కాలమే జీవించింది. 99 ఏళ్ల వయసులో ఆమె 2019లో మృతిచెందింది.

- అస్మారా