Afghanistan: ఆ విమానంలో 823 మంది ప్రయాణం!

వాషింగ్టన్‌: అమెరికా వైమానిక దళానికి చెందిన కార్గో విమానం సీ-17 గత ఆదివారం కాబుల్‌ విమానాశ్రయం నుంచి కిక్కిరిసిన జనంతో ప్రయాణించిన దృశ్యాలు సామాజిక మాధ్యమాల్లో చక్కర్లు కొట్టిన సంగతి  తెలిసిందే. నిజానికి ఆ రోజు ఊహకు మించి, మొత్తం 823 మంది అఫ్గాన్‌ శరణార్థులు అందులో ప్రయాణించినట్టు ఎయిర్‌ మొబిలిటీ కమాండ్‌ వెల్లడించింది. తొలుత 640 మందినే లెక్కపెట్టామని, వారి ఒళ్లో కూర్చుని మరో 183 మంది చిన్నారులు ప్రయాణించారని తెలిపింది. సీ-17 ద్వారా ఒకే దఫా ఇంతమందిని తరలించడం ఇదే రికార్డు అని వివరించింది.

వ్యక్తిగత సూచనలు లేకుండా రావొద్దు

కాబుల్‌ విమానాశ్రయం వెలుపల ప్రమాదకర పరిస్థితులు ఉన్నందున... అమెరికా ప్రభుత్వ ప్రతినిధుల నుంచి వ్యక్తిగత సూచనలు వచ్చేంతవరకూ ఎవరూ కాబుల్‌ విమానాశ్రయానికి తరలి రావద్దని అఫ్గాన్‌లోని అమెరికా రాయబార కార్యాలయం శనివారం హెచ్చరించింది.