Smart Phone: స్మార్ట్‌ఫోన్‌ నుంచి మంటలు.. విమానం అత్యవసర ల్యాండింగ్‌

వాషింగ్టన్‌: ఓ ప్రయాణికుడి స్మార్ట్‌ఫోన్‌లో మంటలు చెలరేగడం వల్ల అలస్కా ఎయిర్‌లైన్స్‌ విమానాన్ని అత్యవసరంగా ల్యాండ్‌ చేశారు.  అందులో 128 మంది ప్రయాణికులు సహా ఆరుగురు సిబ్బందిని ఖాళీ చేయించి.. బస్సులో తరలించారు. అమెరికాలో జరిగిన ఈ ఘటనలో కొంత మందికి స్వల్ప గాయాలు మినహా ఎవరికీ ఎలాంటి ప్రమాదం జరగలేదని అధికారులు తెలిపారు. అలస్కా751 విమానం.. 128 మంది ప్రయాణికులతో న్యూ ఓర్లీన్స్‌ నుంచి సీటెల్‌కు ప్రయాణిస్తోంది. ఈ క్రమంలో ఓ ప్రయాణికుడి స్మార్ట్‌ఫోన్‌లో మంటలు చెలరేగాయి. దీంతో అప్రమత్తమైన సిబ్బంది.. మంటలు అదుపు చేసి, సీటెల్‌-టాకోమా అంతర్జాతీయ విమానాశ్రయంలో విమానాన్ని అత్యవసరంగా దించారు. ప్రయాణికులతో పాటు సిబ్బందిని సురక్షితంగా బస్సులో తరలించారు. అనంతరం ఘటనపై దర్యాప్తు జరిపిన సిబ్బంది.. ఆ స్మార్ట్‌ఫోన్‌ పూర్తిగా దగ్ధమైనట్లు గుర్తించారు.