Updated : 03 Oct 2021 15:50 IST

North Korea: చక్రం తిప్పనున్న కిమ్‌ సోదరి

ప్రభుత్వ వ్యవహారాల కమిటీ సభ్యురాలిగా నియామకం 

ప్యాంగ్‌యాంగ్‌: అమెరికా నుంచి తనకు కావలసింది సాధించుకోవాలంటే దక్షిణ కొరియాపై ఒత్తిడి పెంచాలనీ, దాంతో అమెరికా దిగివస్తుందని ఉత్తర కొరియా మొదట నుంచీ లెక్కవేసుకుంటోంది. ఈసారి ఆ పనిని సమర్థంగా చేయడానికి ఉత్తర కొరియా అధినేత కిమ్‌ జోంగ్‌ ఉన్‌ తన సోదరి కిమ్‌ యో జోంగ్‌ను రంగంలోకి దింపారు. యో జోంగ్‌ను కొన్ని రోజుల క్రితం ప్రభుత్వ వ్యవహారాల కమిటీ సభ్యురాలిగా నియమించడంతో.. సోదరుడి తరఫున విదేశాంగ వ్యవహారాలను చక్కబెట్టే పనిని ఆమెకు అప్పగించినట్లు స్పష్టమైంది. యో జోంగ్‌ సామాన్యురాలు కాదు. ఒకవైపు శాంతి ప్రతిపాదనలు చేస్తూనే, రెండోవైపు ఆయుధ బలాన్ని ప్రదర్శించడం ఆమె ప్రత్యేకత. అమెరికా, ఉత్తర కొరియాల మధ్య అణ్వాయుధాలపై చర్చలు ప్రతిష్టంభించిన సమయంలోనే యో జోంగ్‌ తమ గడ్డపై దక్షిణ కొరియా నిర్మించిన సమన్వయ కార్యాలయాన్ని జూన్‌లో ధ్వంసం చేయించారు. ఉత్తర కొరియాతో బేషరతుగా చర్చలు జరపడానికి అమెరికా సిద్ధంగా ఉందని జో బైడెన్‌ ప్రకటించగా, యో జోంగ్‌ అందుకు మెలికలు పెట్టారు. తమ దేశంపై అమెరికా విధించిన ఆర్థిక ఆంక్షలను ఎత్తివేసి, దక్షిణ కొరియా-అమెరికా సంయుక్త సైనిక విన్యాసాలకు స్వస్తి చెబితేనే చర్చలకు ఒప్పుకొంటామని యో జోంగ్‌ తెగేసి చెప్పారు.

తరవాత దక్షిణ కొరియాతో షరతులతో కూడిన చర్చలు జరుపుతామని ప్రకటించారు. ఆరు నెలల తరవాత మొదటిసారిగా క్షిపణి పరీక్షలు నిర్వహించారు. ఆపై తన సోదరుడు కిమ్‌ అధ్యక్షతలోని ప్రభుత్వ వ్యవహారాల కమిటీలో సభ్యురాలిగా యో జోంగ్‌కు పదోన్నతి లభించింది. 30వ పడిలో ఉన్న యో జోంగ్‌ను ప్రస్తుతం ఉత్తర కొరియాలో కిమ్‌ తరవాత అత్యంత శక్తిమంతమైన నేతగా పరిగణించవచ్చని దక్షిణ కొరియా గూఢచారి సంస్థ పేర్కొన్నది. ఇక నుంచి అమెరికా, దక్షిణ కొరియాలతో జరిగే చర్చల్లో యో జోంగ్‌ ఉత్తర కొరియా అధికార ప్రతినిధిగా పాల్గొంటారని నిపుణుల అంచనా. బహుశా ఆమెను అమెరికాలో తమ ప్రత్యేక దూతగా కిమ్‌ నియమించినా ఆశ్చర్యం లేదు. 
మరోవైపు, ఉత్తర కొరియా అణ్వస్త్రాలను విడనాడటానికి ముందుకు రానంతవరకు ఆ దేశంపై ఆర్థిక ఆంక్షలను సడలించేది లేదని బైడెన్‌ విస్పష్టంగా ప్రకటించారు. కానీ, ఉత్తర కొరియా ధిక్కారపూరితంగా సెప్టెంబరు 11 నుంచి అణ్వస్త్ర వాహక సామర్థ్యమున్న క్రూయిజ్‌ క్షిపణినీ, కదిలే రైలు మీద నుంచి లేచే క్షిపణినీ పరీక్షించింది. ఒక హైపర్‌ సోనిక్‌ క్షిపణిని రూపొందించే పనిలో నిమగ్నమైంది. దక్షిణ కొరియాకు అమెరికా అందించిన ఆధునిక ఫైటర్‌ విమానాలను కూల్చేయగల క్షిపణులనూ పరీక్షించింది.  


Read latest India News and Telugu News

 Follow us on Facebook, Twitter, Instagram, Koo, ShareChat and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

జిల్లా వార్తలు

సినిమా

మరిన్ని

బిజినెస్

మరిన్ని

క్రీడలు

మరిన్ని

పాలిటిక్స్

మరిన్ని

వెబ్ ప్రత్యేకం

మరిన్ని

జనరల్

మరిన్ని