Bald head: బట్టతలపై కొత్త వెంట్రుకలు!

పట్నా: సిరిసంపదలు ఎంత ఉన్నా, నెత్తిన జుట్టు లేకపోతే... ఆ లోటే వేరు! దీనికి పరిష్కారం కనుగొనేందుకు ప్రపంచ వ్యాప్తంగా ఎన్నో పరిశోధనలు సాగుతున్నాయి. పట్నాలోని అఖిల భారత వైద్య విజ్ఞాన సంస్థ (ఎయిమ్స్‌), ఐఐటీలు కూడా సంయుక్తంగా దీనిపై దృష్టి సారించాయి. గామా కిరణాలతో బట్టతలపై వెంట్రుకలు పుట్టుకొచ్చేలా చేయవచ్చని, ఆ దిశగా తాము కృషి చేస్తున్నామని పరిశోధనకర్త డా.యోగేశ్‌ కుమార్‌ చెప్పారు. మహిళలు కూడా ఈ సమస్య కారణంగా తీవ్ర ఆత్మన్యూనతకు, అవమానాలకు గురవుతున్నారు. బట్టతల మూడు దశల్లో వస్తుందని డా.యోగేశ్‌ కుమార్‌ వివరించారు.

* అనాజెన్‌: ఇది మొదటి దశ. జుట్టు కుదుళ్లలో చీలికలు వస్తాయి. దీంతో వెంట్రుకలు పట్టు కోల్పోయి, రాలిపోతుంటాయి.

* కెటాజెన్‌: మొదటిదశ ఫలితంగా ఇది మొదలవుతుంది. రెండోదశలో జుట్టు పెరగడం తగ్గిపోతుంది. బట్టతల ఆనవాళ్లు కనిపిస్తాయి.

* టెలోజెన్‌: ఈ దశలో సమస్య తీవ్రంగా ఉంటుంది.కొత్త జుట్టు మొలవడమన్నదే ఉండదు.

*  హెయిర్‌ ట్రాన్స్‌ప్లాంటేషన్‌ ఖర్చుతో కూడుకున్న వ్యవహారం. పైగా దుష్ప్రభావాల ముప్పు ఎక్కువ. వీటిని దృష్టిలో పెట్టుకుని... ఐఐటీ-పట్నాలోని ఇంక్యుబేషన్‌ సెంటర్‌లో ప్రత్యేక గ్యాడ్జెట్‌ను ఏర్పాటుచేశారు. దీని ద్వారా గామా కిరణాలతో చికిత్స అందిస్తారు. టెలోజెన్‌ దశలో ఉన్న సమస్యను కెటాజెన్‌కు మారేలా చేస్తారు. తద్వారా బట్టతలపై కొత్త వెంట్రుకలు మొలవడం ప్రారంభమవుతాయని యోగేశ్‌ వివరించారు.