cooking oil: వంట నూనెల ధరల్లో ఊరట.. దిగుమతి సుంకాల తగ్గింపు

దిల్లీ: పండగల సీజన్‌లో వంట నూనెల ధరలు పెరగకుండా కట్టడి చేసేందుకు, వినియోగదారులకు ఉపశమనం కలిగించేందుకు కేంద్ర ప్రభుత్వం నిర్ణయం తీసుకుంది. శనివారం నుంచే ఇది అమలులోకి వచ్చిందని కేంద్ర ఆర్థిక మంత్రిత్వ శాఖ ఒక ప్రకటనలో తెలిపింది. తాజా నిర్ణయం ప్రకారం ముడి పామాయిల్‌పై దిగుమతి సుంకం ప్రస్తుతమున్న 10 శాతం నుంచి 2.5శాతానికి, ముడి సోయాబీన్‌, పొద్దుతిరుగుడు నూనెలపై 7.5 శాతం నుంచి 2.5 శాతానికి తగ్గింది. దీంతో దిగుమతి సుంకం సహా అన్ని రకాల పన్నులు కలిపి ఈ మూడు రకాల ముడి నూనెలపై 24.75శాతానికి, రిఫైన్డ్‌ ఆయిల్‌ రకాలపై 35.75 శాతానికి పరిమితం కానున్నాయి. వినియోగదారుల వద్దకు వచ్చే సరికి ఒక్కో లీటరు నూనె ధర రూ.4 నుంచి రూ.5 వరకు తగ్గే అవకాశం ఉందని పరిశ్రమ వర్గాలు అభిప్రాయపడుతున్నాయి. ప్రభుత్వం దాదాపు రూ.1100 కోట్ల ఆదాయాన్ని కోల్పోతుందని ఆర్థిక శాఖ పేర్కొంది.