The Challenge: అంతరిక్షం నుంచి తిరిగొచ్చిన చిత్రబృందం

మాస్కో: సినిమా చిత్రీకరణ నిమిత్తం అంతర్జాతీయ అంతరిక్ష కేంద్రానికి(ఐఎస్‌ఎస్‌) వెళ్లిన బృందం 12 రోజుల అనంతరం ఆదివారం విజయవంతంగా తిరిగొచ్చింది. ఐఎస్‌ఎస్‌ నుంచి వారిని తీసుకొచ్చిన స్పేస్‌ కాప్స్యూల్‌ భూవాతావరణంలోకి ప్రవేశించాక పారాచూట్‌ సాయంతో కజకిస్థాన్‌లోని గడ్డి మైదానాల్లో సురక్షితంగా ల్యాండ్‌ అయింది. భూమికి తిరిగొచ్చిన నటి యులియా పెరెసిల్డ్‌, దర్శకుడు క్లిమ్‌ షిపెంకోలతో పాటు వ్యోమగామి ఒలెగ్‌ నొవిట్స్కీలను వైద్య శిబిరానికి తరలించారు. ఈ దృశ్యాలను కూడా సినిమా కోసం చిత్రీకరించారు.  అనంతరం వారికి జరిపిన పరీక్షల్లో సంపూర్ణ ఆరోగ్యంతో ఉన్నట్లు తేలింది. ‘ఛాలెంజ్‌’ సినిమా చిత్రీకరణ కోసం వీరంతా ఐఎస్‌ఎస్‌కు వెళ్లారు.