Aadhaar: ఆధార్‌ నిబంధనలు ఉల్లంఘిస్తే రూ.కోటి జరిమానా

 ఉడాయ్‌కి చర్యలు తీసుకునే అధికారం

కేంద్ర ప్రభుత్వ కీలక నిర్ణయం

దిల్లీ: ఆధార్‌ వినియోగంలో ఉల్లంఘనలను దృష్టిలో ఉంచుకొని కేంద్ర ప్రభుత్వం కీలక నిర్ణయం తీసుకుంది. ఈ వ్యవస్థను నిర్వహిస్తున్న ఆధార్‌ ప్రాధికార సంస్థ-ఉడాయ్‌(యూఐడీఏఐ)కు చట్టం ఉల్లంఘనలపై చర్యలు తీసుకునే అధికారాన్ని కల్పించింది. ఈ మేరకు కేంద్రం బుధవారం ప్రకటన విడుదల చేసింది. కేంద్రం ఇచ్చిన అధికారంతో ఆధార్‌ చట్టాన్ని ఉల్లంఘించిన వారిపై వచ్చే ఫిర్యాదులను ఉడాయ్‌ పరిశీలించి గరిష్ఠంగా రూ.కోటి వరకు జరిమానా విధించవచ్చు. ఫిర్యాదుల పరిశీలనకు న్యాయాధికారులను నియమించుకునే అధికారం ఆ సంస్థకు ఉంటుంది. న్యాయాధికారులు విధించిన జరిమానాలపై అప్పీలు చేసుకోవాలంటే టెలికాం వివాదాల పరిష్కారాల ట్రైబ్యునల్‌ అప్పీలేట్‌ అథారిటీగా ఉంటుందని కేంద్రం పేర్కొంది. దీనికి సంబంధించిన చట్టాన్ని రెండేళ్ల క్రితమే ఆమోదించగా తాజాగా అందుకు వీలు కల్పించే నిబంధనలను ప్రభుత్వం నోటిఫై చేసింది.