Anand Mahindra: కొవిడ్ విషం చిమ్మినా.. ఆ కన్నతండ్రి కష్టం చూస్తే..!

ముంబయి: ప్రముఖ వ్యాపారవేత్త ఆనంద్‌ మహీంద్రా కొత్త సంవత్సరం పట్ల ఆశావహ దృక్పథాన్ని ప్రదర్శించారు. కొవిడ్ చిమ్మిన విషం నుంచి ప్రపంచమంతా కోలుకోవాలని ఆకాక్షించిన ఆయన.. రెండు స్ఫూర్తిదాయక సందేశాలను ట్విటర్‌లో షేర్ చేశారు.

‘కొత్త సంవత్సరం పట్ల నాకున్న ఆశలన్నీ ఈ ఒక్క వీడియోలోనే కనిపిస్తాయి. తీవ్రమైన విష ప్రభావానికి గురై కోలుకున్న ఈ ఆండియన్ కాండర్‌ (దక్షిణ అమెరికాకు చెందిన పక్షి)ను పెరూవియన్ పర్వతాల వద్ద వదిలేశారు. కొవిడ్ ఈ ప్రపంచాన్ని విషతుల్యం చేసింది. 2022లో మనం కూడా ఆ ప్రభావం నుంచి బయటపడొచ్చు. అందరికీ నూతన సంవత్సర శుభాకాంక్షలు’ అంటూ పర్వతాల మధ్య ఎగురుతున్న ఆ పక్షి వీడియోను షేర్ చేశారు ఆనంద్‌ మహీంద్రా. విషం బారినపడి కోలుకున్న తర్వాత అది స్వేచ్ఛగా ఎగరడం ఆ వీడియోలో చూడొచ్చు.

‘ఈ ఏడాది నేను అమితంగా ఇష్టపడిన ఫొటో ఇది. క్షమించండి.. దీన్ని ఎవరు తీశారో నాకు తెలీదు. ఇది నా ఇన్‌బాక్స్‌లో కనిపించింది. ఆశ, కృషి, ఆశావాదానికి ఈ చిత్రం నిలువెత్తు నిదర్శనం. మనం ఎందుకు జీవిస్తున్నామో ఈ ఒక్క దృశ్యం తెలియజేస్తోంది’ అంటూ మరో ఫొటోను ఆనంద్‌ మహీంద్రా షేర్ చేశారు. ఇందులో ఓ తండ్రి చదువుకుంటున్న తన కుమారుడిని తోపుడు బండిపై తీసుకెళ్తూ కనిపించాడు. కొడుకేమో పుస్తకంలో రాసే పనిలో పూర్తిగా నిమగ్నమయ్యాడు.