CBSE: వచ్చేవారం సీబీఎస్‌ఈ పదో తరగతి ఫలితాలు...

దిల్లీ: సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌ (సీబీఎస్‌ఈ) 10వ తరగతి ఫలితాలపై కసరత్తును ముమ్మరం చేసినట్టు సీబీఎస్‌ఈ పరీక్షల నిర్వహణ అధికారి సన్యం భరద్వాజ్‌ తెలిపారు. వచ్చే వారంలో ఈ ఫలితాలను విడుదల చేసేందుకు ప్రయత్నిస్తామన్నారు.

సీబీఎస్‌ఈ 12వ తరగతి ఫలితాలు శుక్రవారం విడుదలైన విషయం తెలిసిందే. రికార్డు స్థాయిలో 99.37శాతం మంది విద్యార్థులు ఉత్తీర్ణత సాధించారు. ఈ సందర్భంగా సన్యం భరద్వాజ్‌ మీడియాతో మాట్లాడుతూ.. పదో తరగతి ఫలితాలను వచ్చేవారంలో విడుదల చేసేందుకు కసరత్తు జరుగుతోందని తెలిపారు. అయితే కచ్చితమైన తేదీని మాత్రం ఆయన వెల్లడించలేదు. 

ఈ సందర్భంగా సీబీఎస్‌ఈలో ‘సెమిస్టర్‌’ విధానంపైనా ఆయన స్పందించారు. ఏడాదికి ఒకటి కంటే ఎక్కువ పరీక్షలు నిర్వహించేలా ఓ స్కీమ్‌ను రూపొందించినట్లు తెలిపారు. దానివల్ల భవిష్యతుల్లో ఇలాంటి మహమ్మారి తరహా పరిస్థితులు ఎదురైతే పరీక్ష నిర్వహణ, ఫలితాల వెల్లడికి పెద్దగా సమస్యలు ఎదురవవని ఆయన అభిప్రాయపడ్డారు. 2021-22 విద్యా సంవత్సరానికి సంబంధించి 10, 12వ తరగతి బోర్డు పరీక్షల కోసం కేంద్ర మాధ్యమిక విద్యా మండలి (సీబీఎస్‌ఈ) ఇటీవల ప్రత్యేక మదింపు విధానాన్ని ప్రకటించిన విషయం తెలిసిందే. అకాడమిక్‌ సెషన్‌ను రెండు భాగాలుగా విభజించి పరీక్షలు నిర్వహించనున్నట్లు వెల్లడించింది.