Covid Origins: నిరాధార ఆరోపణలు చేస్తే ఎదురుదాడికి సిద్ధం: చైనా

కొవిడ్‌ మూలాలను అమెరికా రాజకీయం చేస్తోందన్న చైనా

బీజింగ్‌: యావత్‌ ప్రపంచాన్ని వణికిస్తున్న కొవిడ్‌ మహమ్మారి మూలాలపై అమెరికా-చైనా మధ్య కోల్డ్‌వార్‌ నడుస్తూనే ఉంది. తాజాగా వీటిపై మరింత స్వరం పెంచిన చైనా.. కొవిడ్‌ విషయంలో తమపై నిందలు వేస్తూ ఈ విషయాన్ని అమెరికా రాజకీయం చేస్తోందని మండిపడింది. కేవలం చైనాను బలిపశువు చేసినంత మాత్రాన.. అమెరికా కప్పిపుచ్చుకోలేదని చైనా విదేశాంగశాఖ డైరెక్టర్‌ జనరల్‌ ఫూ కాంగ్‌ స్పష్టం చేశారు. ఒకవేళ తమపై నిరాధార ఆరోపణలు చేయాలనుకుంటే.. తాము చేసే ఎదురుదాడికి సిద్ధంగా ఉండాలని హెచ్చరించారు. కొవిడ్‌ మూలాలపై అమెరికా రూపొందించిన నివేదిక త్వరలోనే విడుదల కానున్న నేపథ్యంలో చైనా విదేశీ వ్యవహారాలశాఖ డీజీ అంతర్జాతీయ మీడియాతో మాట్లాడారు.

ప్రపంచ దేశాలను సంక్షోభంలోకి నెట్టిన కరోనా వైరస్‌ తొలుత చైనాలోని వుహాన్‌లో వెలుగు చూసిన విషయం తెలిసిందే. అయితే, మహమ్మారి బయటపడి దాదాపు 20 నెలలు కావొస్తున్నా.. వాటి మూలాలు మాత్రం మిస్టరీగానే మిగిలిపోయాయి. ఇప్పటికే వీటిపై దర్యాప్తు జరిపిన ప్రపంచ ఆరోగ్యసంస్థ (WHO) ప్రతినిధుల బృందం.. మరోసారి వాటిని శోధించేందుకు సన్నద్ధమవుతోంది. ఇదే సమయంలో వుహాన్ వైరాలజీ ల్యాబ్‌ నుంచే వైరస్‌ లీక్‌ అయ్యిందనే వాదనలు అంతర్జాతీయంగా ఎక్కువయ్యాయి. ఈ వాదనకు మద్దతివ్వాలనుకుంటే అమెరికాలోని ఫోర్ట్‌ డెట్రిక్‌ను డబ్ల్యూహెచ్‌వో బృందం సందర్శించాలని చైనా విదేశాంగ శాఖ డీజీ సూచించారు. ఇది న్యాయమైన అంశంగా పేర్కొన్న ఫూ కాంగ్‌.. దాని తర్వాతే వుహాన్‌లో రెండోసారి దర్యాప్తునకు రావచ్చని అభిప్రాయపడ్డారు.

ఇదిలా ఉంటే, అమెరికా అధ్యక్షుడిగా బాధ్యతలు స్వీకరించిన జో బైడెన్‌, కొవిడ్‌ మూలాలపై వస్తున్న ఇరు వాదనలపై ఓ నివేదికను రూపొందించి ఇవ్వాలని అక్కడి నిఘా విభాగానికి సూచించారు. దాన్ని 90 రోజుల్లోనే పూర్తి చేయాలని ఆదేశించారు. తాజాగా ఆ గడువు సమీపించడంతో అమెరికా అధికారులు వారివద్ద ఉన్న కీలక సమాచారంతో ఓ నివేదికను విడుదల చేసేందుకు సిద్ధమవుతున్నట్లు తెలుస్తోంది. దీంతో ఆందోళనకు గురౌతున్న చైనా.. వుహాన్‌ ల్యాబ్‌ లీక్‌ థియరీపై అమెరికా చేస్తున్న ఆరోపణలను చైనా ముందుగానే తిప్పికొట్టే ప్రయత్నాలు మొదలుపెట్టింది.