Modi: కరోనా సంక్షోభం రాజకీయాంశం కాదు..!

భాజపా ఎంపీలకు ప్రధాని దిశానిర్దేశం

దిల్లీ: దేశం ఎదుర్కొంటున్న కరోనా సంక్షోభం రాజకీయాంశం కాదని.. మానవాళి ఎదుర్కొంటున్న సమస్య అని ప్రధానమంత్రి నరేంద్ర మోదీ పేర్కొన్నారు. ఇలాంటి సమయంలో దేశంలో ఏ ఒక్కరూ ఆకలితో అలమటించకుండా తమ ప్రభుత్వం భరోసా ఇచ్చిందని పునరుద్ఘాటించారు. ఎన్నో ఏళ్ల సుదీర్ఘ సమయం తర్వాత ఇలాంటి మహమ్మారిని ప్రపంచం చవిచూస్తోందని భాజపా ఎంపీలతో ప్రధాని మోదీ పేర్కొన్నట్లు పార్లమెంటరీ వ్యవహారాలశాఖ మంత్రి ప్రహ్లాద్‌ జోషి వెల్లడించారు.

మహమ్మారి విలయతాండవం చేస్తోన్న వేళ దేశంలో మెజారిటీ ప్రజలు రేషన్‌ పొందారని ప్రధాని మోదీ వెల్లడించారు. అయితే, ఇలా ప్రజలకు ఉపశమనం కలిగించే చర్యలు చేపట్టడం సహాయంలో భాగం కాదని.. ఇది ప్రభుత్వ బాధ్యత అని చెప్పారు. అందుకే కరోనా సంక్షోభం తమకు రాజకీయాంశం కాదని గుర్తుచేసిన ఆయన, మానవాళి ఎదుర్కొంటున్న అతిపెద్ద విపత్తు అని ఆందోళన వ్యక్తంచేశారు. ఇలాంటి విపత్కర సమయంలో ప్రతిపక్ష నాయకుల తీరును ప్రశ్నించారు. కరోనా విషయంలో పార్లమెంట్‌ ఉభయసభల్లో చర్చించేందుకు కేంద్ర ప్రభుత్వం సిద్ధంగా ఉందని.. కానీ, ప్రతిపక్ష పార్టీలు బాధ్యతారాహిత్యంగా వ్యవహరిస్తున్నాయని ప్రధాని అసంతృప్తి వ్యక్తం చేసినట్లు ప్రహ్లాద్‌ జోషి తెలిపారు. ఈ నేపథ్యంలో కరోనా కట్టడి చర్యలు, వ్యాక్సిన్‌ విధానంపై ప్రతిపక్షాలకు దీటుగా సమాధానం ఇవ్వాలని భాజపా ఎంపీలకు మోదీ సూచించారని చెప్పారు.

ఇదిలాఉంటే, దేశంలో కరోనా మహమ్మారి నియంత్రణలో ప్రభుత్వం సరిగా వ్యవహరించడం లేదంటూ ప్రతిపక్ష పార్టీలు కేంద్రంపై ఆగ్రహం వ్యక్తం చేస్తున్నాయి. అంతేకాకుండా వ్యాక్సిన్‌ విధానంపైనా అనుమానాలు వ్యక్తం చేస్తున్నాయి. వీటికితోడు తాజాగా వెలుగు చూసిన పెగాసస్‌ హ్యాకింగ్‌ ఉదంతం, ధరల పెరుగుదల, రైతుల ఆందోళనలు వంటి కీలక అంశాలపై చర్చ జరగాల్సిందేనని పట్టుబడుతున్నాయి. దీంతో ఉభయసభలు విపక్షాల ఆందోళనలతో అట్టుడికిపోతున్నాయి.