COVID-19 Pill: కరోనా మాత్ర వినియోగానికి సానుకూలంగా అమెరికా!

వాషింగ్టన్‌: అంతర్జాతీయ ఫార్మా సంస్థ ‘మెర్క్’ రూపొందించిన కొవిడ్ ఔషధం ‘మోల్నూపిరవిర్’ వినియోగంపై అమెరికా ఫుడ్ అండ్ డ్రగ్స్ అడ్మినిస్ట్రేషన్​(ఎఫ్​డీఏ)కు చెందిన ఆరోగ్య సలహాదారుల కమిటీ సానుకూలంగా స్పందించింది. దీంతో ఈ ఔషధం త్వరలోనే అమెరికా పౌరులు వినియోగించేందుకు మార్గం సుగమం కానుంది. గర్భాధారణ సమయంలో ఈ ఔషధాన్ని వినియోగిస్తే.. శిశువులకు పుట్టుకతో వచ్చే ఎలాంటి లోపాలు రావని, వివిధ ముప్పులను అధిగమిస్తుందని కమిటీలోని 13-10 మంది ఓటు వేశారు. ఈ మాత్ర ప్రయోజనాలపై విస్తృత చర్చ జరిగిన తర్వాత ఈ మేరకు కమిటీ ఆమోదం తెలిపింది. ఈ ఔషధాన్ని గర్భిణులు ఉపయోగించే విషయంపై దృష్టిసారించాలని ఎఫ్​డీఏకు కమిటీ సూచించింది.

ఆస్తమా, ఊబకాయం వంటి సమస్యలు ఉన్నవారితోపాటు అత్యధిక ముప్పును ఎదుర్కొనే వయోజనులు ఈ ఔషధం ఉపయోగించవచ్చని కమిటీ తెలిపింది. వ్యాక్సిన్ తీసుకున్నవారు ఈ ఔషధాన్ని వినియోగించవచ్చా? వద్దా? అన్నదానిపై పరిశోధన కొనసాగుతున్న నేపథ్యంలో.. వారు ఈ మాత్రను వినియోగించకూడదని కమిటీలో చాలా మంది సభ్యులు పేర్కొన్నారు. మోల్నూపిరవిర్ మాత్రపై ప్యానెల్ చేసిన సూచనలపై ఎఫ్​డీఏ పూర్తిగా ఆధారపడదని అధికారులు వెల్లడించారు. ఈ ఏడాది చివరికల్లా ఈ ఔషధ అత్యవసర వినియోగానికి ఆమోదం తెలిపే విషయంపై సొంతంగా నిర్ణయం తీసుకోనున్నట్లు తెలిపారు.

కరోనాను ఎదుర్కోవడంలో మోల్నుపిరవిర్ సమర్థంగా పని చేస్తుందని పరిశోధనల్లో తేలింది. కరోనా కొత్త వేరియంట్ ఒమిక్రాన్‌​ను ఎదుర్కోగలదా? లేదా? అనే అంశాన్ని అధికారులు పరిశీలిస్తున్నారు. అయితే ఒమిక్రాన్​పై ఈ పిల్ సామర్థ్యాన్ని ఇంకా పరిశీలించనప్పటికీ.. కొంతమేర ప్రభావవంతంగానే పనిచేస్తుందని వారు భావిస్తున్నారు. ‘కరోనా కొత్త వేరియంట్లను మోల్నుపిరవిర్ ఎదుర్కొంటుందనడానికి ఆధారం లేదు. దీని గురించి ప్రకటించే విషయంలో జాగ్రత్తగా వ్యవహరించాలి’ అని చార్లెస్ డ్రూ యూనివర్సిటీ స్కూల్ మెడిసిన్ అండ్ సైన్సెస్​కు చెందిన డాక్టర్ డేవిడ్ హార్డీ అభిప్రాయపడ్డారు. ఎఫ్​డీఏ ఆరోగ్య నిపుణుల కమిటీలో ఆయన కూడా సభ్యుడిగా ఉన్నారు.

► Read latest National - International News and Telugu News