Omicron: దేశంలో మరో 8 ఒమిక్రాన్‌ కేసులు..49కి చేరిన బాధితుల సంఖ్య

దిల్లీ: కరోనా కొత్త వేరియంట్ ఒమిక్రాన్‌ దేశంలో క్రమంగా విస్తరిస్తోంది. మంగళవారం దిల్లీలో నాలుగు, రాజస్థాన్‌లో నాలుగు ఒమిక్రాన్ కేసులు వెలుగుచూశాయి. దాంతో దేశవ్యాప్తంగా ఈ రకం కేసుల సంఖ్య 49కి చేరింది. ప్రస్తుతం దిల్లీలో ఒమిక్రాన్‌ కేసులు ఆరుకు చేరగా.. రాజస్థాన్‌లో 13కు పెరిగాయి.  దీనిపై ఆయా ఆరోగ్య శాఖ మంత్రులు స్పందించారు.

‘దిల్లీలో మరో నలుగురికి ఒమిక్రాన్ పాజిటివ్‌గా తేలింది. దాంతో ఆ వేరియంట్ బాధితుల సంఖ్య ఆరుకి చేరింది. వీరిలో ఓ వ్యక్తి కోలుకొని ఆసుపత్రి నుంచి ఇంటికి చేరుకున్నారు. ప్రస్తుతం 35 మంది కొవిడ్ బాధితులు, ముగ్గురు కొవిడ్ అనుమానితులు ఎల్‌ఎన్‌జేపీ ఆసుపత్రిలో చేరారు’ అని దిల్లీ ఆరోగ్య మంత్రి సత్యేంద్ర జైన్‌ వెల్లడించారు. రాజస్థాన్‌లో మరో నాలుగు ఒమిక్రాన్ కేసులు వెలుగుచూశాయని ఆ రాష్ట్ర ఆరోగ్య శాఖ మంత్రి పర్సాడీ లాల్ మీనా వెల్లడించారు. బాధితుల ఆరోగ్య పరిస్థితి నిలకడగానే ఉందన్నారు. ఇంతకుముందున్న ఒమిక్రాన్‌ బాధితులందరికీ కొవిడ్‌ నెగెటివ్‌గా తేలినట్లు చెప్పారు.

డిసెంబర్ 2న కర్ణాటకలో తొలుత ఒమిక్రాన్‌ వేరియంట్‌ను గుర్తించారు. ఈ 12 రోజుల వ్యవధిలో ఆ వేరియంట్ పలు రాష్ట్రాలకు వ్యాపించింది. మహారాష్ట్రలో అత్యధికంగా 20 మందిలో వెలుగుచూసింది. ఇదిలా ఉండగా.. గత నెల మొదట దక్షిణాఫ్రికాలో బయటపడిన ఈ వేరియంట్.. ఇప్పటికే 60కి పైగా దేశాలకు విస్తరించిందని ప్రపంచ ఆరోగ్య సంస్థ వెల్లడించింది.