Third Wave: మరో రెండు వారాల పాటు కేసులపెరుగుదల కొనసాగితే..!

దిల్లీ: దేశ రాజధాని దిల్లీ, ఆర్థిక రాజధాని ముంబయిలో కొద్ది రోజులుగా కరోనా కేసుల్లో పెరుగుదల కనిపిస్తోంది. అందుకు ఒమిక్రాన్ తోడైంది. దాంతో ఈ పరిస్థితి మూడో వేవ్‌కు దారితీస్తుందనే భయం వ్యక్తం అవుతోంది. అది ఎంతవరకు నిజం అవుతుందనే దానిపై  వైద్య నిపుణులు తమ అభిప్రాయాలు పంచుకున్నారు. మరో రెండు వారాల పాటు స్థిరంగా కేసుల పెరుగుదల కొనసాగితే.. మూడో వేవ్ ప్రారంభమయ్యే అవకాశం ఉందని వెల్లడించారు. 

‘మరో రెండు వారాలపాటు స్థిరంగా కేసులు పెరిగితే.. మరో వేవ్‌ ప్రారంభమైందో లేదో స్పష్టమవుతుంది. ఆ అంకెలను తీసుకువచ్చి గ్రాఫ్ గీస్తే.. అది అప్‌వర్డ్ కర్వ్‌ను చూపుతుంది. అది మరో వేవ్‌ను సూచిస్తుంది. ప్రస్తుతం అధికారులు ఈ ధోరణిని నిశితంగా గమనించాలి. అయితే గత కొద్దిరోజులుగా దిల్లీ, ముంబయిలో కేసులు పెరుగుతున్నప్పటికీ.. దేశ వ్యాప్తంగా మాత్రం ఆ పెరుగుదల కనిపించడం లేదు. మరోపక్క ప్రపంచ వ్యాప్తంగా డెల్టా స్థానాన్ని ఒమిక్రాన్ భర్తీ చేస్తోంది. అయితే దీని వల్ల స్వల్ప స్థాయి లక్షణాలు కనిపిస్తున్నట్లు తెలుస్తోంది. వైరస్ సోకడం వల్ల, టీకాల వల్ల భారతీయులకు రోగ నిరోధక శక్తి లభించడంతో.. తదుపరి వేవ్ అంతప్రమాదకరంగా ఉండకపోవచ్చు’ అని వైద్య నిపుణులు వెల్లడించారు.