India Corona: మళ్లీ పెరిగిన కరోనా కేసులు.. కొత్త కేసులెన్నంటే?

దిల్లీ: దేశంలో కరోనా కేసుల ఉద్ధృతి కొనసాగుతోంది. బుధవారం కేంద్ర వైద్యారోగ్యశాఖ విడుదల చేసిన బులెటిన్‌లో 38,353 మంది కొవిడ్‌ బారిన పడగా.. ఇవాళ ఆ సంఖ్యలో కాస్త పెరుగుదల నమోదైంది. గడిచిన 24 గంటల్లో 21,24,953 కరోనా పరీక్షలు చేయగా 41,195 కొత్త కేసులు నమోదయ్యాయి. ఇప్పటి వరకు చేసిన కొవిడ్‌ పరీక్షల సంఖ్య 48,73,70,196కి చేరింది. వైరస్‌ బారిన పడి మరో 490 మంది ప్రాణాలు కోల్పోయారు. దీంతో మహమ్మారి బారిన పడి మృతిచెందిన వారి సంఖ్య మొత్తం 4,29,669కి చేరింది.

ప్రస్తుతం దేశంలో 3,87,987 కరోనా యాక్టివ్‌ కేసులున్నట్లు కేంద్ర వైద్యారోగ్యశాఖ తెలిపింది. దేశవ్యాప్తంగా ఇప్పటి వరకు 48.73 కోట్లకు పైగా టీకా డోసులను పంపిణీ చేసినట్లు వివరించింది. కరోనా రికవరీ రేటు 97.45 శాతంగా ఉంది. కేరళలో అత్యధికంగా 23,500, మహారాష్ట్రలో 5,560, ఆంధ్రప్రదేశ్‌లో 1869, తమిళనాడులో 1964, కర్ణాటకలో 1826, పశ్చిమబెంగాల్‌లో 639 కేసులు నమోదయ్యాయి.