చైనాకు దీటైన జవాబు.. గల్వాన్‌లో జాతీయ జెండా ఆవిష్కరించిన సైన్యం

దిల్లీ: తూర్పు లద్దాఖ్‌లోని గల్వాన్ లోయలో కొత్త సంవత్సరం ప్రారంభంరోజున జాతీయ పతాకం ఎగురవేసి ఆ ప్రాంతం తమదే అని చైనా సైన్యం పరోక్షంగా చాటే ప్రయత్నం చేసిన వేళ భారత సైన్యం కూడా అందుకు దీటుగా స్పందించింది. కొత్త ఏడాది మొదలైన రోజు గల్వాన్ లోయలో తాము కూడా పతాకావిష్కరణ చేసినట్లు తాజాగా ప్రకటించింది. ఈ మేరకు పలు చిత్రాలను విడుదల చేసింది. వాస్తవాధీన రేఖ వద్ద తుపాకులు చేతబట్టి, త్రివర్ణ పతాకం ఎగురవేస్తూ సైనికులు ఫొటోలు దిగారు. సుమారు 30 మంది సైనికులు ఫొటోల్లో కనిపిస్తున్నారు. ఈ వేడుకలకు సంబంధించిన ఫొటోలను కేంద్ర మంత్రి కిరణ్‌ రిజుజు ట్విటర్‌ వేదికగా పంచుకున్నారు.

గల్వాన్ లోయలో చైనా జెండా ఎగురవేయడంపై దేశంలో రాజకీయ దుమారం చెలరేగగా, భారత సైన్యం ఇప్పటికే దానిపై వివరణ ఇచ్చింది. పతాకావిష్కరణకు సంబంధించిన పలు వీడియోలు సోషల్‌ మీడియాలో వైరలయ్యాయి. అయితే చైనా ఆధీనంలో ఉన్న వివాదరహిత ప్రాంతంలోనే డ్రాగన్ పతాకావిష్కరణ చేసినట్లు తెలిపింది.