Jan Dhan Yojna: 43 కోట్ల ఖాతాలు.. డిపాజిట్ల మొత్తం 1.46లక్షల కోట్లు

దిల్లీ: ప్రధానమంత్రి జన్‌ధన్ యోజన(పీఎంజేడీవై) కింద బ్యాంకు ఖాతాల సంఖ్య 43 కోట్లకు చేరింది. అలాగే వాటిలో డిపాజిట్ల విలువ 1.46 లక్షల కోట్లుగా ఉంది. ఈ మేరకు శనివారం కేంద్ర ఆర్థిక శాఖ వివరాలను వెల్లడించింది. అందరికి బ్యాంకింగ్ సేవలు అందించేందుకు 2014 ఆగస్టు 28న కేంద్ర ప్రభుత్వం జన్‌ధన్‌ కార్యక్రమాన్ని ప్రారంభించింది. 

పీఎంజేడీవై ప్రారంభమై ఏడేళ్లు పూర్తైన నేపథ్యంలో ప్రధాని నరేంద్ర మోదీ ట్విటర్ వేదికగా స్పందించారు. భారత దేశ ఆర్థిక స్థితిగతులను ఈ పథకం శాశ్వతంగా మార్చివేసిందన్నారు. ‘జన్‌ధన్‌ యోజన లెక్కలేనంత మంది భారతీయులను ఆర్థిక వ్యవస్థలోకి తీసుకువచ్చింది. అలాగే వారి గౌరవాన్ని ఇనుమడింప జేసి, సాధికారతను కల్పించింది. దీనివల్ల ప్రజల జీవన ప్రమాణాలు మెరుగుపడ్డాయి’ అని ఆయన వెల్లడించారు. 

ఇదిలా ఉండగా.. ఆగస్టు 18, 2021 నాటికి పీఎంజేడీవై ఖాతాల సంఖ్య 43.03 కోట్లకు చేరింది. ఇందులో 55.47 శాతం మంది ఖాతాదారులు మహిళలే. అలాగే 66.69 శాతం మంది ఖాతాదారులు గ్రామీణ, సెమీ అర్బన్ ప్రాంతాల్లో ఉన్నారని ఆర్థిక శాఖ వెల్లడించింది. అలాగే మొత్తం ఖాతాల్లో 85.6 శాతం ఖాతాలు క్రియాశీలకంగా ఉన్నాయని పేర్కొంది. ఒక్కో ఖాతాలో సగటున రూ.3,398 ఉన్నట్లు తెలిపింది. అలాగే జన్‌ధన్ ఖాతాదారులకు జారీ అయిన రూపే కార్డుల సంఖ్య 31.23 కోట్లకు పెరిగింది.