Karnataka: హామీ పత్రం ఇస్తేనే టీకా వేసుకుంటా.. కర్ణాటకవాసి వినూత్న డిమాండ్​ 

బెంగళూరు: కొవిడ్‌ టీకాపై ఉన్న అపోహలను తొలగిస్తూ అధికారులు అవగాహన కల్పిస్తున్నా.. కొందరు మాత్రం టీకా తీసుకునేదుకు సంకోచిస్తూనే ఉన్నారు. కర్ణాటకలోని ధార్వాడ్‌కు చెందిన ఓ వ్యక్తి వినూత్న డిమాండ్‌తో ముందుకొచ్చాడు. టీకా వేసుకుంటే తనకు ఎలాంటి ఆరోగ్య సమస్యలూ రావనే హామీ పత్రం ఇవ్వాలని కలెక్టర్​ను డిమాండ్​ చేశాడు. జిల్లాలో కరోనా కేసులు పెరుగుతున్న క్రమంలో జిల్లా కలెక్టర్ నితీశ్ పాటిల్​ స్థానికులతో అవగాహన కార్యక్రమాన్ని నిర్వహించారు. షాపింగ్ మాళ్లు, వ్యాయామశాలలు​, బార్లు, రెస్టారెంట్లు, మల్టీప్లెక్స్​లకు చెందినవారు ఈ సమావేశానికి హాజరయ్యారు. ఈ క్రమంలో ఆనంద్​ కుందనూర్​ అనే వ్యక్తి టీకా హామీ పత్రాన్ని ఇవ్వాలని డిమాండ్​ చేశారు. వ్యాక్సిన్ వేసుకుంటే తనకు ఏ ఆరోగ్య సమస్యలూ రావనే హామీ పత్రం ఇవ్వాలని కోరారు. దీంతో చేసేదేమీలేక అధికారులందరూ హామీ పత్రంపై సంతకాలు చేశారు.

టీకా భయంతో ఇంటిపైకి ఎక్కిన వృద్ధుడు

టీకా వేసుకుంటే ఏమౌతుందో అనే భయంతో ఓ వృద్ధుడు ఇంటిపైకి ఎక్కాడు. ఈ ఘటన సైతం కర్ణాటకలోనే జరగింది. దావణగెరె జిల్లాలోని హదాడి గ్రామంలో ఆశా కార్యకర్తలు ఇంటింటికీ తిరిగి కొవిడ్​ వ్యాక్సిన్లు వేస్తున్నారు. ఈ క్రమంలో ఆ గ్రామానికి చెందిన హనుమంతప్ప (77) టీకా తీసుకునేందుకు నిరాకరించాడు. వ్యాక్సిన్​ వద్దేవద్దంటూ ఇంటిపైకి ఎక్కి కూర్చున్నాడు. ఎలాగోలా హనుమంతప్పకు నచ్చజెప్పి టీకావేసి వెళ్లిపోయారు.

► Read latest National - International News and Telugu News