Lakhimpur Kheri: లఖింపుర్ ఖేరి ఘటన.. ప్రణాళికాబద్ధమైన కుట్ర..!

వెల్లడించిన సిట్‌

లఖ్‌నవూ: ఉత్తర్‌ప్రదేశ్‌లోని లఖింపుర్‌ ఖేరిలో రైతులపై జరిగిన హింసాకాండ.. ప్రణాళికాబద్ధమైన కుట్ర అని ప్రత్యేక దర్యాప్తు బృందం(సిట్‌) వెల్లడించింది. దేశవ్యాప్తంగా సంచలనం సృష్టించిన ఈ ఘటనలో కేంద్ర మంత్రి అజయ్ మిశ్రా తనయుడు ఆశిశ్‌ మిశ్రా ప్రధాన నిందితుడు. ఆశిశ్ మిశ్రాపై నమోదైన అభియోగాలను సవరించాలని ఈ కేసును దర్యాప్తు చేస్తోన్న అధికారులు న్యాయమూర్తికి లేఖ రాశారు. ఇప్పటికే ఈ కేసులో మంత్రి కుమారుడు, తదితరులు హత్య, కుట్రకు పాల్పడినట్లు ఆరోపణలు ఎదుర్కొంటున్నారు. వాటితో పాటు హత్యా ప్రయత్నం, ఇతర అభియోగాలను జోడించాలని ఆ లేఖలో కోరారు.

లఖింపుర్‌లో సాగు చట్టాలను వ్యతిరేకిస్తూ శాంతియుతంగా నిరసన తెలుపుతున్న రైతులపైకి అక్టోబర్ 3న ఆశిశ్ మిశ్రా వాహన శ్రేణి దూసుకెళ్లింది. ఆ ఘటనలో నలుగురు రైతులు మరణించారు. ఆ తర్వాత జరిగిన ఘర్షణల్లో మరో నలుగురు ప్రాణాలు కోల్పోయారు. ఆ ఘటనకు సంబంధించిన వీడియోలో రైతులపైకి ఎస్‌యూవీ వాహనం వేగంగా దూసుకెళ్లినట్లు కనిపించింది. ఇది దేశవ్యాప్తంగా ప్రజల్లో ఆగ్రహానికి దారితీసింది. కేంద్రమంత్రిగా ఉన్న అజయ్ మిశ్రాను వెంటనే తొలగించాలని విపక్షాలు తీవ్రంగా డిమాండ్ చేశాయి. కాగా, ఈ కేసు విచారణపై సుప్రీం కోర్టు యూపీ ప్రభుత్వంపై తీవ్ర అసహనం వ్యక్తం చేసింది. ఈ కేసును త్వరితగతిన కొలిక్కి తేవాలని గత నెల ప్రత్యేక దర్యాప్తు బృందాన్ని ఆదేశించింది. ఇదిలా ఉండగా.. రైతులు వ్యతిరేకించిన సాగు చట్టాల రద్దు బిల్లులు ఇటీవల పార్లమెంట్‌లో ఆమోదం పొందిన సంగతి తెలిసిందే.