కుమారుడి కోసం చిరుతతో తల్లి పోరాటం

మధ్యప్రదేశ్‌లో ఓ తల్లి ప్రదర్శించిన ధైర్యసాహసాలకు సర్వత్రా ప్రశంసలు అందుతున్నాయి. కుమారుడిని నోట కరచుకుపోతున్న చిరుతతో పోరాడి బిడ్డను రక్షించుకుంది బైగా తెగకు చెందిన కిరణ్‌ అనే మహిళ. సిద్ధి జిల్లా బరిజహారియా గ్రామంలో ఈ ఘటన జరిగింది. ఆదివారం సాయంత్రం తన ఇంటి వద్ద పిల్లలతో కలిసి చలిమంట కాచుకుంటోంది కిరణ్‌. ఓ బిడ్డ ఆమె ఒడిలో కూర్చోగా మరో ఇద్దరు పక్కనే ఉన్నారు. ఆ సమయంలో అకస్మాత్తుగా వచ్చిన చిరుత ఓ పిల్లాడిని నోట కరచుకుని అడవిలోకి పరుగులు తీసింది. వెంటనే కిరణ్‌ సైతం దాన్ని వెంబడించింది. కిలోమీటరు దూరంలో చిరుతను గుర్తించి.. పోరాడి కుమారుడిని రక్షించింది. తల్లిబిడ్డలపై చిరుత దాడి చేస్తుండగా.. అంతలోనే గ్రామస్థులు వచ్చి దానిని తరిమేశారు. గాయపడిన తల్లిబిడ్డలను ఆసుపత్రిలో చేర్పించారు. వారు క్షేమంగానే ఉన్నట్లు అధికారులు వెల్లడించారు.