Infiltrator: దేశంలో ఉగ్రకుట్ర.. చొరబాటుదారుడిని కాల్చిచంపిన సైన్యం

దిల్లీ: దాయాది దేశం పాకిస్థాన్‌​ వక్రబుద్ధి మరోసారి బయటపడింది. కాల్పుల విరమణ అవగాహన ఒప్పందాన్ని ఉల్లంఘిస్తూ.. ఆ దేశానికి చెందిన ఓ వ్యక్తి అక్రమంగా భారత్‌లోకి చొరబడేందుకు యత్నించాడు. జమ్ముకశ్మీర్​ కుప్వారాలోకి లైన్‌ ఆఫ్‌ కంట్రోల్‌ (LoC) వద్ద అక్రమంగా ప్రవేశించాలని చూడగా.. సైన్యం అతడిని మట్టుబెట్టింది. దుండగుడి వద్ద నుంచి ఏకే-47 సహా భారీ మొత్తంలో మందుగుండు సామగ్రిని స్వాధీనం చేసుకుంది. దేశంలో ఉగ్రకుట్రను భగ్రం చేసినట్లు అధికారులు తెలిపారు.

రెండు దేశాల మధ్య ఉన్న కాల్పుల విరమణ అవగాహన ఒప్పందాన్ని పాక్​ ఉల్లంఘిస్తూనే ఉందని సైనిక ప్రతినిధి వెల్లడించారు. ఇది పాకిస్థాన్ ఆర్మీకి చెందిన బోర్డర్​ యాక్షన్​ టీమ్​ (BAT) చొరబాటుగా పేర్కొన్నారు. జనవరి 1న కేరన్​ సెక్టార్​లో అక్రమ చొరబాటుకు ప్రయత్నించగా.. వెంటనే స్పందించిన భారత సైన్యం ఆ ఉగ్రవాదిని హతమార్చినట్లు వివరించారు. నియంత్రణ రేఖ వెంబడి మధ్యాహ్నం 3 గంటల ప్రాంతంలో అతడి కదలికలను గమనించినట్లు స్పష్టం చేశారు. మట్టుబెట్టిన ముష్కరుడిని పాక్​కు చెందిన మహ్మద్​ షబ్బీర్​ మాలిక్​గా అధికారులు గుర్తించారు. అతడి వద్ద ఓ ఏకే-47, మందుగుండు సామగ్రి సహా.. పాకిస్థాన్ జారీ చేసినట్లుగా ఉన్న గుర్తింపు కార్డు, వ్యాక్సినేషన్​ సర్టిఫికెట్‌ను స్వాధీనం చేసుకున్నారు.