Rafale: భారత్‌ కోరితే మరిన్ని రఫేల్‌ విమానాలను అందిస్తాం: ఫ్రాన్స్‌

దిల్లీ: రఫేల్​ యుద్ధ విమానాలకు సంబంధించి ఫ్రాన్స్​ రక్షణ శాఖ మంత్రి కీలక వ్యాఖ్యలు చేశారు. భారత్​ అవసరాల మేరకు మరిన్ని రఫేల్​ విమానాలను అందించేందుకు ఫ్రాన్స్​ సిద్ధంగా ఉన్నట్లు మంత్రి ఫ్లోరెన్స్​ పార్లే ప్రకటించారు. భారత్​, ఫ్రాన్స్​ ఒకే రకమైన ఆయుధాలు వినియోగించడం రెండు వ్యూహాత్మక భాగస్వామ్య దేశాల బలమైన బంధానికి అద్దం పడుతోందని ఆమె పేర్కొన్నారు. భారత్​-ఫ్రాన్స్​ సహకారంపై దిల్లీలో నిర్వహించిన చర్చా గోష్ఠిలో భారత రక్షణ శాఖ మంత్రి రాజ్‌నాథ్‌ సింగ్‌తో కలిసి  పాల్గొన్న పార్లే ఈ వ్యాఖ్యలు చేశారు. మేకిన్​ ఇండియాకు మద్దతు ఇచ్చేందుకు ఫ్రాన్స్​ కట్టుబడి ఉన్నట్లు ఫ్లోరెన్స్ స్పష్టం చేశారు.

ప్రపంచవ్యాప్తంగా భారతీయ ఉత్పత్తులకు ప్రోత్సాహం కల్పించనున్నట్లు ఫ్లోరెన్స్​ పార్లే పేర్కొన్నారు. రఫేల్​ జెట్స్‌తో భారత వాయుసేన సంతృప్తిగా ఉండటం పట్ల ఆమె ఆనందం వ్యక్తం చేశారు. కరోనా సంక్లిష్ట సమయంలోనూ అనుకున్న సమయానికే 36 యుద్ధవిమానాలు భారత్​కు అందించడం గొప్ప ఘనతగా అభిప్రాయపడ్డారు. భారత్​కు ఇప్పటివరకు 33 రఫేల్​ జెట్లు అందించినట్లు ఫ్రాన్స్​ రాయబార కార్యాలయం గురువారం తెలిపింది.

నాలుగేళ్ల తర్వాత భారత అమ్ములపొదిలో..

ఫ్రాన్స్​ నుంచి 36 రఫేల్​ యుద్ధ విమానాల కొనుగోలుకు రూ.59వేల కోట్ల విలువైన ఒప్పందాన్ని  భారత్.. 2016 సెప్టెంబర్​లో కుదుర్చుకుంది​. కాగా ఈ విమానాలను ఫ్రాన్స్​కు చెందిన దసో ఏవియేషన్​ సంస్థ తయారు చేస్తోంది. ఈ ఒప్పందంలో భాగంగానే సుమారు నాలుగేళ్ల తర్వాత గతేడాది జులై 29న తొలి బ్యాచ్​లో 5 రఫేల్​లు భారత్​కు చేరుకున్నాయి. సెప్టెంబర్​ 10న అవి వాయుసేనలో చేరాయి. రెండో బ్యాచ్​లో మూడు రఫేల్​ విమానాలు 2020 నవంబర్​ 3న భారత్​కు చేరుకున్నాయి. మూడో బ్యాచ్​లో మరో 3 ఈ ఏడాది జనవరి 27న వాయుసేనలో చేరాయి. తొలి రఫేల్​ స్క్వాడ్రాన్​ను హరియాణాలోని అంబాలాలో ఏర్పాటు చేశారు. రెండో స్క్వాడ్రాన్​ను బెంగాల్​లోని బసిమారాలో ఏర్పాటు చేసేందుకు వాయుసేన ప్రణాళికలు చేస్తోంది.

మోదీ ప్రభుత్వంపై విమర్శనాస్త్రాలు

రఫేల్​ ఒప్పందం భారత్​లో రాజకీయ వివాదంగా మారింది. మోదీ సర్కార్​పై విపక్షాలు ముఖ్యంగా కాంగ్రెస్ ఈ అంశంపై​ విమర్శనాస్త్రాలు సంధిస్తూనే ఉంది. ఈ ఒప్పందంలో కోట్లాది రూపాయల అవకతవకలు జరిగాయంటూ ఆరోపిస్తోంది. పార్లమెంటులోనూ ఈ వ్యవహారంపై దుమారం చెలరేగింది. ఇదిలా ఉండగా.. భారత్​తో రఫేల్​ యుద్ధ విమానాల కొనుగోలు ఒప్పందం కుదిరేలా చూసేందుకు దసో ఏవియేషన్​ సంస్థ భారీగా ముడుపులు ఇచ్చిందంటూ ఫ్రాన్స్​కు చెందిన ‘మీడియాపార్ట్​’ జర్నల్​ నవంబర్​లో సంచలన వార్త ప్రచురించింది. ఇందుకోసం బోగస్ ఇన్‌వాయిస్​లు రూపొందించిందని వెల్లడించింది. ఓ మధ్యవర్తికి దసో ఏవియేషన్ 7.5 మిలియన్​ యూరోలు (రూ. 64.32కోట్లు) ముడుపులను రహస్యంగా అందించేందుకు ఈ ఇన్​వాయిస్​లు ఉపయోగపడ్డాయని ఆరోపించింది. బోగస్​ ఇన్​వాయిస్​కు సంబంధించిన పత్రాలు అందుబాటులో ఉన్నప్పటికీ, భారత దర్యాప్తు సంస్థలు విచారణ చేపట్టలేదని మీడియాపార్ట్​ ఆరోపించింది.