Bipin Rawat: ప్రభుత్వంపై జనరల్‌ బిపిన్‌ రావత్‌ బావమరిది సంచలన వ్యాఖ్యలు

దిల్లీ: భారత త్రిదళాధిపతి, దివంగత జనరల్​ బిపిన్​ రావత్​ బావమరిది యశోవర్ధన్​ సింగ్​ సంచలన ఆరోపణలు చేశారు. అనుమతి లేకుండా మధ్యప్రదేశ్​ ప్రభుత్వం తన భూమిని స్వాధీనం చేసుకుందని ఆరోపించారు. జాతీయ రహదారి పనుల కోసం తన సొంత భూమిని వినియోగిస్తున్నట్లు ఫేస్​బుక్​లో ఓ పోస్ట్​ పెట్టారు. రావత్​ మరణించిన వారం రోజులకే ఆయన బావమరిది ఇలాంటి వ్యాఖ్యలు చేయడం చర్చనీయాంశమైంది. తన బావ బిపిన్​ రావత్, సోదరి మధులికా రావత్ అంత్యక్రియల రోజు ఈ విషయాన్ని తాను గుర్తించినట్లు ఆయన తెలిపారు. దీనికి సంబంధించి ముందస్తు సమాచారం ఇవ్వలేదని, ఎలాంటి నష్టపరిహారమూ అందించలేదని యశో​వర్ధన్​ తెలిపారు.

‘భూమి తీసుకున్నందుకు నాకు ఎలాంటి పరిహారం ఇవ్వలేదు. ఎవరైనా ఈ వ్యవహారంలో జోక్యం చేసుకుంటే చట్టపరమైన చర్యలు తీసుకోవాలని పోలీసులకు ఆదేశాలు అందాయి’ అని యశో​వర్ధన్​ సింగ్​ ఫేస్‌బుక్‌ ద్వారా వెల్లడించారు. దేశానికి సేవచేసేందుకు ముందుంటామని, కానీ అధికారులు ఎలాంటి సమాచారం లేకుండా ఈ విధానాన్ని ఎలా అనుసరిస్తారు? అని ఆయన ప్రశ్నించారు. మధులిక స్వస్థలమైన మధ్యప్రదేశ్​లోని షహడోల్‌ జిల్లా రాజాబాఘ్ సోహగ్​పుర్​లో జాతీయ రహదారికి ఆనుకొని సింగ్‌ కొంత భూమి ఉంది. ప్రస్తుతం అక్కడే జాతీయ రహదారి విస్తరణ పనులు జరుగుతున్నట్లు ఆయన పేర్కొన్నారు.

ఈ వ్యవహారం షహడోల్‌ జిల్లా కలెక్టర్​ వందనా వైద్య వరకు చేరింది. దీనిపై విచారణ జరిపిస్తానని, తహశీల్దార్​ సహా ఇతర అధికారులను సంఘటనా స్థలానికి పంపి పరిశీలిస్తామని ఆమె తెలిపారు. విచారణ అనంతరమే.. ఈ అంశంపై పూర్తి స్పష్టత వస్తుందన్నారు. ఇదే అంశంపై రాష్ట్ర హోం మంత్రి నరోత్తమ్​ మిశ్రా కూడా ట్వీట్​ చేశారు. ఎస్పీ నుంచి పూర్తి వివరాలు కోరిన ఆయన.. ఎవరైనా సరే చట్ట వ్యతిరేక చర్యలకు పాల్పడినట్లు తెలిస్తే కఠినంగా శిక్షిస్తామని హెచ్చరించారు.