Lakhimpur Kheri: లఖింపుర్‌ కేసు దర్యాప్తు బాధ్యతలు.. ఇక విశ్రాంత న్యాయమూర్తికి

దిల్లీ: లఖింపుర్‌ ఖేరి ఘటనపై దర్యాప్తు పర్యవేక్షణ బాధ్యతలను ఓ విశ్రాంత న్యాయమూర్తికి సుప్రీంకోర్టు అప్పగించింది. పంజాబ్‌-హరియాణా హైకోర్టు మాజీ న్యాయమూర్తి జస్టిస్‌ రాకేశ్‌ కుమార్‌ జైన్‌ ఈ కేసు దర్యాప్తును పర్యవేక్షిస్తారని పేర్కొంది. ఈ మేరకు ప్రధాన న్యాయమూర్తి జస్టిస్‌ ఎన్వీ రమణ నేతృత్వంలోని సుప్రీంకోర్టు ధర్మాసనం ఆదేశాలు జారీచేసింది. న్యాయబద్ధంగా, స్వతంత్రంగా ఈ కేసు దర్యాప్తు జరిగేలా రాకేష్ జైన్ దర్యాప్తును పర్యవేక్షిస్తారని చీఫ్‌ జస్టిస్‌ పేర్కొన్నారు.

లఖింపూర్‌ ఖేరి ఘటనపై దర్యాప్తు చేస్తున్న ప్రత్యేక దర్యాప్తు బృందంలో ఉత్తర్‌ప్రదేశ్‌ కేడర్‌కు చెందిన ముగ్గురు ఐపీఎస్​ అధికారులను సుప్రీంకోర్టు చేర్చింది. వారు ఉత్తరప్రదేశ్‌కు చెందినవారు కానందున దర్యాప్తు బృందంలో నియమిస్తున్నట్లు స్పష్టం చేసింది. సిట్‌ విచారణ పూర్తిచేసి స్థాయీ నివేదిక సమర్పించిన తర్వాత ఈ కేసు విచారణను మరోసారి చేపడతామని సుప్రీం ధర్మాసనం ప్రకటించింది.

కారు కింద నలిగిపోయి నలుగురు.. ఘర్షణల్లో మరో నలుగురు

అక్టోబర్‌ 3న లఖింపుర్‌ ఖేరిలో సాగుచట్టాలకు వ్యతిరేకంగా నిరసన తెలుపుతున్న రైతులపై ఓ కారు దూసుకెళ్లింది. ఈ దుర్ఘటనలో నలుగురు రైతులు మృతిచెందారు. అనంతరం చెలరేగిన హింసాత్మక ఘటనలో మరో నలుగురు మృతిచెందారు. దీంతో ఈ ఘటన ఒక్కసారిగా దేశవ్యాప్తంగా సంచలనమైంది. రైతుల మృతిపై ఎఫ్‌ఐఆర్‌ నమోదైంది. కాగా ఈ ఘటనలో కేంద్ర హోంశాఖ సహాయమంత్రి అజయ్​మిశ్రా కుమారుడు ఆశిష్‌ మిశ్రా నిందితుడిగా ఆరోపణలు ఎదుర్కొంటున్నారు. క్రైం బ్రాంచ్‌ పోలీసులు ఆశిష్‌ మిశ్రాను సుదీర్ఘంగా విచారించి అనంతరం  అరెస్ట్‌ చేశారు.