Published : 07/12/2021 02:22 IST

Chewing Gum: చూయింగ్‌ గమ్‌తో.. కరోనా వ్యాప్తికి చెక్‌..!

ప్రయత్నాలు చేస్తున్న అమెరికా శాస్త్రవేత్తలు

వాషింగ్టన్‌: యావత్‌ ప్రపంచాన్ని వణికిస్తున్న కొవిడ్‌-19 మహమ్మారి సంక్రమణను అరికట్టేందుకు ఎన్నో పద్ధతులపై ప్రయత్నాలు జరుగుతున్నాయి. ఇందులో భాగంగా నోటిలోనే వైరస్‌కు ముకుతాడు వేసేందుకు శాస్త్రవేత్తలు ప్రయత్నిస్తున్నారు. ఇందుకోసం ప్రత్యేకంగా వృద్ధిచేసిన మొక్కల ఆధారిత ప్రోటీన్‌ పొరతో కూడిన చూయింగ్‌ గమ్‌ను అభివృద్ధి చేసే పనిలో అమెరికా శాస్త్రవేత్తలు నిమగ్నమయ్యారు. తద్వారా లాలాజలంలో ఉండే వైరల్‌ లోడ్‌కు అడ్డుకట్ట వేసి.. వైరస్‌ వ్యాప్తిని తగ్గించే ప్రయత్నం చేస్తున్నారు. తాజా అధ్యయనం మాలిక్యూలర్‌ థెరపీ జర్నల్‌లో ప్రచురితమైంది.

‘కొవిడ్‌-19కు కారణమైన సార్స్‌-కోవ్‌-2 లాలాజల గ్రంథుల్లో రెట్టింపవుతుంది. ఇన్‌ఫెక్షన్‌ సోకిన వ్యక్తి తుమ్మినా, దగ్గినా, లేదా మాట్లాడినప్పుడు వైరస్‌ బయటకు వచ్చి ఇతరులకు సంక్రమిస్తుంది. అందుకే వ్యాధి సంక్రమణకు కేంద్ర బిందువుగా ఉండే లాలాజలంలోనే వైరస్‌ను తటస్థీకరించడంలో ఈ చూయింగ్‌ గమ్‌ ఎంతగానో తోడ్పడుతుంది’ అని అమెరికాలోని యూనివర్సిటీ ఆఫ్‌ పెన్సిల్వేనియాకు చెందిన పరిశోధకుడు హెన్రీ డానియెల్‌ పేర్కొన్నారు.

కరోనా వైరస్‌ వెలుగుచూడక ముందు.. రక్తపోటు తగ్గించే చికిత్సలో ఏస్‌2 గ్రాహకాల పనితీరుపై హెన్రీ డానియల్‌ అధ్యయనం చేశారు. ఇందుకోసం ఆయన సొంత ల్యాబ్‌లో ప్రత్యేక ప్రొటీన్‌ను వృద్ధి చేశారు. వీటితోపాటు ప్రొటీన్‌ ఆధారిత చూయింగ్‌ గమ్‌ను ఉపయోగించి దంతాలపై ఏర్పడే పూత నివారణపై జరిపిన పరిశోధనలోనూ పాల్గొన్నారు. ఇలా ప్రొటీన్‌ ఆధారంగా డానియల్‌ చేసిన ప్రయత్నాలు మెరుగైన ఫలితాలు ఇచ్చాయి. దీంతో కొవిడ్‌-19కు కారణమైన వైరస్‌ను ఎదుర్కొనేందుకు ఈ సాంకేతిక దోహదపడుతుందనే కోణంలో హెన్రీ డానియల్‌ ఆలోచించారు. అందుకు అనుగుణంగా ప్రయత్నాలు మొదలుపెట్టిన హెన్రీ టీమ్‌.. మొక్కల్లో వృద్ధి చేసిన ఏస్‌2 గ్రాహకాలను చూయింగ్‌గమ్‌ పూతగా వాడారు. వాటిని కొవిడ్‌ పాజిటివ్‌ వ్యక్తులతో పాటు ఇతరులకు ఇచ్చి.. వారి నోటి నుంచి నమూనాలను సేకరించి పరీక్షించారు. తద్వారా ఏస్‌2 గ్రాహకాలు కొవిడ్‌-19కు కారణమైన వైరస్‌ను తటస్థీకరిస్తున్నాయనే నిర్ధారణకు వచ్చారు. ముఖ్యంగా వైరస్‌ మానవ కణాల్లోకి వైరస్‌ ప్రవేశించకుండా ఏస్‌2 గ్రాహకాలు అడ్డుకుంటున్నట్లు పరిశోధకులు గుర్తించారు. ప్రస్తుతం ప్రాథమిక పరిశోధనలు ప్రారంభించిన శాస్త్రవేత్తలు.. వీటిపై క్లినికల్‌ ట్రయల్స్‌ నిర్వహించేందుకు అనుమతి కోసం ప్రయత్నాలు జరుపుతున్నట్లు వెల్లడించారు.

Read latest India News and Telugu News

 Follow us on Facebook, Twitter, Instagram, Koo, ShareChat and Google News. Subscribe our Telegram Channel.

Advertisement

Tags :

మరిన్ని

జిల్లా వార్తలు

సినిమా

మరిన్ని

బిజినెస్

మరిన్ని

క్రీడలు

మరిన్ని

పాలిటిక్స్

మరిన్ని

వెబ్ ప్రత్యేకం

మరిన్ని

జనరల్

మరిన్ని