Covid Deaths: అక్కడ మరో 5 లక్షల కరోనా మరణాలు..!

ఐరోపాలో వైరస్ ఉద్ధృతి.. ఆందోళన వ్యక్తం చేసిన ఆరోగ్య సంస్థ

జెనీవా: కరోనా వైరస్ తోకముడిచినట్లే ముడిచి, మళ్లీ చాపకింద నీరులా విస్తరిస్తోంది. ప్రస్తుతం ఐరోపా ఖండంలోని పలు దేశాలు మరోసారి వైరస్‌ కోరల్లో చిక్కుకున్నాయి. దీనిపై ప్రపంచ ఆరోగ్య సంస్థ తీవ్ర ఆందోళన వ్యక్తం చేస్తోంది. ఇదే పరిస్థితి కొనసాగితే వచ్చే ఏడాది ప్రారంభం నాటికి మరో 5 లక్షల మరణాలు సంభవించొచ్చని అంచనా వేసింది. 

‘ఐరోపా ఖండంలోని  దేశాల్లో ప్రస్తుతం వైరస్ వ్యాప్తి తీవ్ర ఆందోళన కలిగిస్తోంది. ఇదే తీరుగా వైరస్ ఉద్ధృతి కొనసాగితే వచ్చే ఫిబ్రవరి నాటికి మరో ఐదు లక్షల మరణాలు సంభవిస్తాయని ఒక అంచనా’ అని ఆరోగ్య సంస్థ ఐరోపా విభాగం డైరెక్టర్ హన్స్ క్లూగే మీడియా సమావేశంలో వెల్లడించారు.

ఐరోపాలో వరుసగా ఐదోవారం కొవిడ్ కేసుల సంఖ్య పెరిగింది. ప్రపంచవ్యాప్తంగా చూడగా.. ఈ ఖండంలోనే కొవిడ్ ఉద్ధృతి పెరుగుతున్నట్లు ఆరోగ్య సంస్థ బుధవారం వెల్లడించింది. మిగతా ప్రాంతాల్లో కేసులు తగ్గడం లేక నిలకడగా కొనసాగడం కనిపిస్తోందని పేర్కొంది. ఇన్ఫెక్షన్ రేటు కూడా అక్కడే ఎక్కువగా ఉన్నట్లు చెప్పింది. ప్రతి లక్ష జనాభాకు 192 కొత్త కేసులు నమోదవుతున్నాయి. ప్రధానంగా బ్రిటన్, రష్యా, టర్కీ, రొమేనియాల్లో కేసుల తీవ్రత ఎక్కువగా ఉంది.