Gangster: 15 ఏళ్ల తర్వాత భారత్‌కు చిక్కిన మోస్ట్‌వాంటెడ్‌ గ్యాంగ్‌స్టర్‌

ముంబయి: మహారాష్ట్ర, కర్ణాటకలో పలు దోపిడీ కేసుల్లో మోస్ట్​ వాంటెడ్​.. 15 ఏళ్లుగా పరారీలో ఉన్న గ్యాంగ్​స్టర్​ సురేశ్​ పూజారిని అధికారులు భారత్​కు రప్పించారు. ఫిలిప్పీన్స్​ నుంచి మంగళవారం రాత్రి భారత్​కు తీసుకొచ్చినట్లు సీనియర్​ పోలీస్​ అధికారి ఒకరు తెలిపారు. మహారాష్ట్ర తీవ్రవాద నిరోధక బృందం (ఏటీఎస్​) పూజారిని బుధవారం దిల్లీలో తమ కస్టడీలోకి తీసుకున్నట్లు వెల్లడించారు. అనంతరం పలు కేసుల్లో విచారణ నిమిత్తం ముంబయికి తరలించినట్లు తెలిపారు.

మంగళవారం రాత్రి ఫిలిప్పీన్స్​ నుంచి దిల్లీకి తీసుకొచ్చిన తర్వాత తొలుత ఇంటెలిజెన్స్​ బ్యూరో (ఐబీ), సీబీఐ అధికారులు సురేశ్‌ను తమ కస్టడీలోకి తీసుకున్నారు. అప్పటికే దిల్లీ చేరుకున్న డీసీపీ రాజ్​కుమార్​ శిండే నేతృత్వంలోని ఏటీఎస్​ బృందం.. అతడిని కస్టడీలోకి తీసుకుని బుధవారం ఉదయం వాయుమార్గంలో ముంబయికి తీసుకొచ్చింది. అనంతరం కోర్టులో హాజరుపరిచి కస్టడీ కోరినట్లు తెలిపారు. ఏటీఎస్​ కస్టడీ పూర్తయ్యాక రాష్ట్ర రాజధానిలో నమోదైన కేసుల దర్యాప్తులో భాగంగా ముంబయి పోలీసులు అదుపులోకి తీసుకునే అవకాశాలు ఉన్నాయని అధికారులు పేర్కొన్నారు.

ముంబయి, ఠాణె, కల్యాణ్‌​, ఉల్హాస్​నగర్​, దోంబివలిలో నమోదైన పలు దోపిడీ కేసుల్లో పూజారి మోస్ట్​వాంటెడ్​. ఈ క్రమంలోనే ముంబయి, ఠాణె పోలీసులు 2017, 2018 రెడ్​ కార్నర్​ నోటీసులు ఇచ్చారు. ఒక్క ఠాణె, ముంబయి పోలీసుస్టేషన్లతో పాటు కేవలం మహారాష్ట్రలోనే అతడిపై 24 కేసులు నమోదయ్యాయి. 15 ఏళ్లుగా పరారీలో ఉన్న పూజారిని గత అక్టోబర్​లో ఫిలిప్పీన్స్​లోని భారత అధికారులు పట్టుకున్నారు. పూజారికి గ్యాంగ్​స్టర్​ రవి అత్యంత దగ్గరి బంధువు. అండర్​వరల్డ్​ డాన్​ చోటా రాజన్​తోనూ పూజారి పనిచేశాడు. ఆ తర్వాత పరారయ్యాడు.