Jammu Kashmir: కశ్మీర్‌లో ఎన్‌కౌంటర్‌.. ఆర్మీ అధికారి వీర మరణం

మరొకరికి గాయాలు, ఒక ఉగ్రవాది హతం

శ్రీనగర్‌: కశ్మీర్‌లో ఉగ్రవాదులు మరోసారి చెలరేగారు. రాజౌరి జిల్లాలోని ఠాణామండీ ప్రాంతంలో గురువారం ఉగ్రవాదులకు, భద్రతాదళాలకు మధ్య జరిగిన కాల్పుల్లో రాష్ట్రీయ రైఫిల్స్‌కు చెందిన ఓ జూనియర్‌ కమిషన్డ్‌ అధికారి(జేసీవో) అమరుడయ్యారు. మరొకరికి గాయాలయ్యాయి. ఈ ఘటనలో ఒక ఉగ్రవాది సైతం హతమైనట్లు అధికారులు వెల్లడించారు. ‘ఉగ్రవాదుల కదలికలపై సమాచారం అందడంతో భద్రతాదళాలు బుధవారం కార్డన్‌ సెర్చ్‌ మొదలుపెట్టాయి. ఈ క్రమంలో గురువారం ఉదయం కార్యోట్‌ కలాస్‌ ప్రాంతంలో వారు తారసపడ్డారు. దీంతో ఇరువర్గాల మధ్య ఫైరింగ్‌ మొదలైందని’ని వివరించారు. ఉగ్రవాదులంతా నియంత్రణ రేఖ దాటి ఈ ప్రాంతంలోకి చొరబడ్డారని డీజీపీ దిల్‌బాగ్ సింగ్ తెలిపారు. ఎంతమంది వచ్చారో తెలియదని, ఎన్‌కౌంటర్ ప్రక్రియ కొనసాగుతోందని చెప్పారు. కొన్ని వారాలుగా రాజౌరి సెక్టార్‌లో వరుస ఎన్‌కౌంటర్లు జరుగుతున్నాయి. ఆగస్టు 6న సైతం ఈ ప్రాంతంలో ఇద్దరు ఉగ్రవాదులను హతమార్చారు.